मुंबई / नगर सह्याद्री : आगामी राज्यसभा निवडणुकीची रणधुमाळी सध्या सुरु आहे. काँग्रेसचे ज्येष्ठ नेते अशोक चव्हाण यांना भाजपात घेत भाजपने त्यांना राज्यसभेची उमेदवारी दिली. दरम्यान भाजपने आणखी दोन उमेदवार दिले पैकी मेधा कुलकर्णी हे नाव देखील सर्वपरिचित आहे. परंतु भाजपचा तिसरा उमेदवार डॉ. अजित गोपछडे यांना राज्यसभेची उमेदवारी दिली. तर ते नमक कोण आहात याबाबत अनेकांना उत्सुकता आहे.
कारसेवक ते वैद्यकीय सेवक
डॉ. अजित गोपछडे हे नांदेडचे शहरातील एमडी डॉक्टर असून, त्यांनी अखिल भारतीय विद्यार्थी परिषदेत काम केले आहे. त्यातून रा. स्व. संघाशीही त्यांचा जवळचा संबंध आहे. तसेच, मागच्या भाजपच्या सत्ताकाळात त्यांची तत्कालीन मुख्यमंत्री व विद्यमान उपमुख्यमंत्री देवेंद्र फडणवीस यांच्याशी जवळीक वाढली.
त्यातच, ते लिंगायत समाजातून येत असल्याने भाजपाने नांदेडसह लातूर, धाराशिव येथील लिंगायत समाजाच्या मतदारांना आकर्षित करत ‘सोशल इंजिनिअरिंग’ साधले आहे. दरम्यान, राम मंदिर आंदोलनातही १९९२ साली कारसेवक म्हणून त्यांनी सहभाग घेतला होता. त्यावेळी, ते २२ वर्षांचे होते. अजित गोपछेडे हे भाजपाच्या डॉक्टर्स आघाडीचे प्रदेशाध्यक्ष राहिले आहेत. तसेच, नाशिकच्या महाराष्ट्र आरोग्य विज्ञान विद्यापीठाच्या व्यवस्थापन परिषदेचे राज्यपाल नियुक्त सदस्यही आहेत.
