अहमदनगर । नगर सहयाद्री ;-
सोमवारी (5 ऑगस्ट) सायंकाळी नगर तालुक्यातील एका माध्यमिक विद्यालयात शिक्षण घेणार्‍या अल्पवयीन मुलीचे (वय 13) तोंड दाबून, हात-पाय बांधून तिचे अपनयन केल्याची धक्कादायक घटना घडली आहे. या प्रकरणी पीडित मुलीने मंगळवारी दिलेल्या फिर्यादीवरून अज्ञात व्यक्तीविरुद्ध भारतीय न्याय संहिता कलम 137 (2) (अपनयन) व 127 (2) (अटकाव करणे) नुसार गुन्हा दाखल करण्यात आला आहे.
फिर्यादीत मुलीने सांगितले की, ती विद्यालयात असताना सायंकाळी साडेचारच्या दरम्यान शौचालयाकडे जात होती. त्याचवेळी अज्ञात व्यक्तीने तिचे तोंड दाबून तिला विद्यालयाच्या गच्चीवर नेले आणि तिला हात, पाय व तोंड बांधून तेथे अटकाव केले. सदरचा प्रकार विद्यालय सुटल्यानंतर साडेपाचच्या सुमारास लक्षात आला, त्यानंतर ग्रामस्थांनी विद्यालयात गर्दी केली आणि मुलीची सुटका केली.
एमआयडीसी पोलिसांना माहिती देण्यात आली आणि सहायक पोलीस निरीक्षक माणिक चौधरी यांनी पथकासह घटनास्थळी धाव घेतली. मुलीला पोलीस ठाण्यात आणून तिच्या सांगण्यावरून फिर्याद नोंदवून घेण्यात आली.
सदरचा मुलगा कोण होता आणि त्याने मुलीसोबत का असे केले याबाबतची माहिती पोलीस घेत आहेत. अधिक तपास पोलीस उपनिरीक्षक मनोज मोढे करत आहेत.
