Vidhan Sabha Election 2024: महाराष्ट्र विधानसभा निवडणूक अवघ्या काही दिवसांवर येऊन ठेपली आहे. त्यातच भाजप, मनसेनंतर आता शिवसेनेची 45 पहिली यादी जाहीर झाली आहे. तर शरद पवार यांनी आपला डाव टाकण्यास सुरुवात केली आहे. शरद पवार यांच्या राष्ट्रवादी काँग्रेसकडून आतापर्यंत 50 जणांना एबी फॉर्मचे वाटप करण्यात आले आहे. अहिल्यानगर जिल्ह्यातील तीन उमेदवारांचा यामध्ये समावेश आहे.
दरम्यान, अहिल्यानगर जिल्ह्यातील १२ मतदारसंघतील श्रीगोंदा मतदारसंघात पुन्हा एक ट्विस्ट समोर आला आहे. भाजपने जाहीर केलेल्या पहिल्याच यादीत विद्यमान आमदार बबनराव पाचपुते यांना तब्येतीच्या कारणास्तव उमेदवारी न देता त्यांच्या पत्नी प्रतिभा पाचपुते यांना भारतीय जनता पक्षाने उमेदवारी दिली आहे.
पाचपुते यांना उमेदवारी जाहीर होताच अनुराधा नागवडे यांनी अजित पवार यांना धक्का देत थेट महाविकास आघाडीत उद्धव ठाकरे शिवसेनेत प्रवेश करण्याचा निर्णय घेत मशाल चिन्हावर उमेदवारी करण्याचा निर्णय अनुराधा नागवडे यांनी घेतला. शिवसेनेत पक्षप्रवेश होणार असून त्यांची उमेदवारी देखील अंतिम असल्याची माहिती समोर आली होती.
अनुराधा नागवडे या भाजपाच्या प्रतिभा पाचपुते यांच्यासमोर उमेदवारी करतील असे एकंदरीत चित्र देखील कालपर्यंत समोर होते. मात्र आता पुन्हा श्रीगोंदा मतदारसंघात एक ट्विस्ट समोर आला आहे. माजी आमदार राहुल जगताप यांनी काही दिवसापूर्वीच शक्तिप्रदर्शन करत ‘वस्तादा’ च्या मार्गदर्शनाखाली विधानसभा ‘फिक्स’, असा संदेश देखील दिला होता. कालच शरद पवार यांच्या राष्ट्रवादी काँग्रेसकडून 50 जणांना एबी फॉर्मचे वाटप करण्यात आले.
यामध्ये अहिल्यानगर जिल्ह्यातील चार उमेदवारांचा समावेश आहे. राहुरी विधानसभा मतदारसंघातून माजी मंत्री प्राजक्त तनपुरे, कर्जत जामखेड मतदारसंघामधून रोहित पवार तर पारनेर मतदारसंघातून राणीताई लंके, श्रीगोंदा मतदारसंघातून राहुल जगताप यांचा समावेश आहे. त्यामुळे श्रीगोंदा मतदारसंघात प्रतिभा पाचपुते विरुद्ध राहुल जगताप असा सामना होणार असल्याचे चित्र समोर आले आहे.
