मध्यप्रदेश | वृत्तसंस्था
महाकुंभ मेळ्यातून परतणाऱ्या भाविकांच्या ट्रॅव्हलरला ट्रकने धडक दिल्याने भीषण अपघात झाला आहे. या अपघातात 7 जणांचा मृत्यू झाला असून अनेक जण जखमी झाले आहेत. मध्य प्रदेशातील जबलपूरमध्ये नागपूर प्रयागराज राष्ट्रीय महामार्गावर ही दुर्घटना घडली. याचवेळी दुसऱ्या बाजूने येणारी कारही ट्रकमध्ये घुसली.
अपघाताच्या घटनेनंतर महामार्गावर प्रचंड वाहतूक कोंडी झाली. घटनेची माहिती मिळताच पोलीस घटनास्थळी दाखल झाले. अपघातग्रस्त वाहनांमध्ये अडकलेल्या लोकांना बाहेर काढण्यात येत आहे. तर वाहनं बाजूला करण्यासाठी क्रेनची मदत घेतली जात आहे.
याबाबत मिळालेली माहिती अशी की, ट्रक जबलपूरहून कटनीच्या दिशेनेजात होता. सकाळी 9 वाजण्याच्या सुमारास सिहोरातील मोहला बरगी गावाजवळ ट्रकचा टायर अचानक फुटला. त्यामुळे कारला धडक देऊन ट्रक विरुद्ध दिशेच्या लेनवर पोहोचला. तेव्हा समोरून येणाऱ्या ट्रॅव्हलरला धडक दिली.
प्रयागराजहून आंध्र प्रदेशला परतण़ाऱ्या ट्रॅव्हलरला धडक बसून जागीच सात जणांचा मृत्यू झाला.अपघातानंतर ट्रक आणि ट्रॅव्हलरमध्ये अडकलेल्या लोकांना बाहेर काढण्यात आलं. यात जखमी झालेल्यांना उपचारासाठी वैद्यकीय रुग्णालय आणि सिहोरा प्राथमिक आरोग्य केंद्रात दाखल करण्यात आलं. अपघातात मृत्यू झालेले आंध्र प्रदेशचे असल्याची प्राथमिक माहिती समजते.
