श्रीगोंदा । नगर सहयाद्री
पंढरपूरची वारी करून घरी परतत असताना येळपणे (ता. श्रीगोंदा) येथील वारकरी मल्हारी बाजीराव पवार यांच्या मोटारसायकलला एका अनोळखी ट्रॅक्टरने धडक दिली. या अपघातात मल्हारी पवार (वय 57) व पंखाबाई मल्हारी पवार (54) यांचा मृत्यू झाला. हा अपघात रविवारी सकाळी अकरा वाजण्याच्या सुमारास झाला. या घटनेने येळपणे गावावर शोककळा पसरली आहे.
पंखाबाई पवार या येळपणे येथील खंडेश्वर महाराज दिंडीत पायी गेल्या होत्या. आपल्या पत्नीला आणण्यासाठी मल्हारी पवार हे मोटारसायकलवरून शनिवारी पंढरपूरला गेले होते. शनिवारी संध्याकाळी पंढरपूर येथील पांडुरंग मंदिराच्या कळसाचे दोघांनी दर्शन घेतले. घराकडे परतण्यासाठी दोघे मोटारसायकलवरून रविवारी सकाळी निघाले. सोलापूर-पुणे रोडने येत असताना भिगवणजवळ एका ट्रॅक्टरने मोटारसायकलला धडक दिली.
मल्हारी पवार जागीच ठार झाले, तर पंखाबाई पवार यांना भिगवण येथील एका खासगी रुग्णालयात दाखल केले होते. मात्र, त्यापूवच त्यांचे निधन झाले. या घटनेचे वृत्त समजताच सैनिक संघटनेचे नवनाथ खामकर व त्यांचे सहकारी घटनास्थळाकडे रवाना झाले. तेथे त्यांनी मदतकार्य केले. रविवारी संध्याकाळी दोघांवर शोकाकुल वातावरणात येळपणे येथे अंत्यसंस्कार करण्यात आले. यावेळी मोठा जनसमुदाय उपस्थित होता. मयत दाम्पत्याच्या पश्चात एक मुलगा, दोन मुली असा परिवार आहे.
