जळगाव-जामोद । नगर सहयाद्री
राज्यातील शेतकऱ्यांच्या वाढत्या असंतोषाचे पडसाद आता थेट लोकप्रतिनिधींवर उमटू लागले आहेत. जळगाव-जामोद येथील भाजप आमदार डॉ. संजय कुटे यांच्या निवासस्थानी एका संतप्त शेतकऱ्याने मध्यरात्री पेट्रोल टाकून जाळण्याचा प्रयत्न केल्याने परिसरात खळबळ उडाली आहे. ही घटना रविवारी मध्यरात्री घडली. प्राप्त माहितीनुसार, बावनबीर गावातील शेतकरी विशाल मुरुड (रा. जि. बुलढाणा) याने शेतीच्या नुकसानीसाठी अद्याप मोबदला न मिळाल्याने हा टोकाचा पाऊल उचलले.
अतिवृष्टीमुळे नुकसान झाल्यानंतरही मदत न मिळाल्याचा आरोप करत, त्याने आमदारांच्या निवासस्थानी पेट्रोल कॅनसह प्रवेश करून “मदत मिळाली नाही, तर घर जाळून टाकतो असा इशारा दिला. घटनेच्या वेळी आमदार डॉ. कुटे स्वतः घरी उपस्थित होते. त्यांच्या म्हणण्यानुसार, स्वीय सहाय्यकाने प्रसंगावधान राखत विशाल मुरुड याला रोखले आणि पोलिसांच्या ताब्यात दिले. या प्रकरणी जळगाव-जामोद पोलीस ठाण्यात BNS कलम 333 आणि 351(2) अंतर्गत गुन्हा दाखल करण्यात आला आहे.
राज्यात मे महिन्याच्या अखेरीस झालेल्या अवकाळी पावसामुळे खरीप पिके, फळबागा आणि भाजीपाला पिकांचे मोठे नुकसान झाले. अनेक भागांमध्ये पंचनामे झाले असले तरी मदतीचा निधी अद्याप वितरण झालेला नाही, अशी तक्रार शेतकरी करत आहेत.डॉ. संजय कुटे हे २००४ पासून सलग पाच वेळा आमदारपदी निवडून आले असून, विधानसभेत त्यांच्या मुद्देसूद भाषणशैलीसाठी ते ओळखले जातात. या घटनेनंतर लोकप्रतिनिधींच्या सुरक्षेचा मुद्दा पुन्हा ऐरणीवर आला आहे. या पार्श्वभूमीवर राज्य शासन यावर कोणती भूमिका घेते, याकडे संपूर्ण राज्याचे लक्ष लागले आहे.
