सुरक्षा यंत्रणा अलर्ट | संस्थानला आला धमकीचा मेल
शिर्डी | नगर सह्याद्री
जगभरातील लाखो भाविकांचे श्रद्धास्थान असलेल्या शिर्डीतील साई मंदिराला बॉम्बने उडवून देण्याची धमकी मिळाली आहे. साई संस्थानला पुन्हा एकदा धमकीचा मेल आला असून मंदिर आणि त्यातील खोल्यांमध्ये बॉम्ब ठेवल्याचा उल्लेख मेलमध्ये करण्यात आला आहे. भगवंत मान या नावाने हा मेल साई संस्थानला मिळाला आहे. याप्रकरणी साई संस्थानने शिर्डी पोलीस स्थानकात तक्रार दाखल केली असून सुरक्षा यंत्रणा अलर्ट मोडवर आहे.
शिर्डीतील साई मंदिराला दरवर्षी लाखो लोक भेट देतात. यात देश, विदेशातील भाविकांचा समावेश असतो. अशातच मंदिराला बॉम्बने उडवून देण्याची वारंवार धमकी मिळत आहे. आताही लहरर्सींरपींहारपपूरपवशु.लेा या आयडीवरून साई संस्थानला धमकीचा मेल आला आहे. साई मंदिर आणि त्यातील खोल्यांमध्ये बॉम्ब ठेवला असून भाविक, कर्मचार्‍यांना तात्काळ मंदिरातून बाहेर काढण्याचे मेलनमध्ये नमूद करण्यात आले आहे.धमकीच्या मेलनंतर साई संस्थानने शिर्डी पोलीस स्थानकामध्ये तक्रार दाखल केली आहे. तसेच साई संस्थानची सुरक्षा यंत्रणा अलर्ट मोडवर असून मंदिर परिसरात सुरक्षा व्यवस्था कडक करण्यात आली आहे.
धमकीच्या मेलने खळबळ
दोन महिन्यांपूर्वीही शिर्डी साई मंदिर बॉम्बने उडवून देण्याचा मेल आला होता. त्यानंतर आता पुन्हा एकदा धमकीचा मेल आल्याने खळबळ उडाली आहे. आता हा खोडसाळपणा की आणखी काही याबाबत शिर्डी पोलिसांकडून तपास सुरू करण्यात आला आहे.
