अहिल्यानगर । नगर सहयाद्री:-
रात्रीच्या वेळी वाहन चालकाला रस्त्यात अडवून मारहाण करत लुटल्याची घटना अहिल्यानगर-पुणे महामार्गावर चास (ता. नगर) शिवारात असलेल्या भारत पेट्रोल पंपासमोर बुधवारी (19 मार्च) रात्री 11.45 वाजण्याच्या सुमारास घडली. या घटनेची माहिती मिळताच नगर तालुका पोलिसांनी केडगाव येथील तीन संशयितांना पहाटेच्या सुमारास पकडले. यात दोघा अल्पवयीन मुलांचा समावेश आहे. याबाबत तोफिक शरीफ अन्सारी (वय 29, रा. झारखंड) यांनी नगर तालुका पोलीस ठाण्यात फिर्याद दिली आहे.
फिर्यादी हे बुधवारी रात्री 11.45 वाजण्याच्या सुमारास त्यांच्या ताब्यातील कंटेनर घेवून पुण्याहून अहिल्यानगरच्या दिशेने येत असताना चास शिवारात दोन दुचाकीवरून तीन अनोळखी तरूण आले. त्यांनी भारत पेट्रोल पंपासमोर कंटेनरला दुचाक्या आडव्या लावून कंटेनर रस्त्याच्या कडेला थांबविण्यास भाग पाडले. त्यानंतर तिघांनी चालक अन्सारी यांना मारहाण करत जीवे मारण्याची धमकी देत अन्सारी यांच्याकडील सात हजारांची रोकड तसेच कागदपत्रे असलेली बॅग बळजबरीने हिसकावून घेत तेथून पळून गेले.
जाताना त्यांनी कंटेनरच्या काचांवर दगड फेकून मारत त्या फोडून नुकसान केले. या घटनेनंतर कंटेनर चालक अन्सारी यांनी पेट्रोल पंपावरील कर्मचार्‍यांच्या मदतीने नगर तालुका पोलिसांशी संपर्क साधून लुटमारीची माहिती दिली. पोलीस पथकाने घटनास्थळी धाव घेत संशयित आरोपींचा शोध सुरू केला. सदरचा गुन्हा केडगाव येथील तिघांनी केल्याची माहिती पोलिसांना मिळाली. त्यावरून त्यांनी केडगावच्या एकनाथनगर येथील सनी धोत्रे व त्याच्या दोन अल्पवयीन साथीदारांना ताब्यात घेतले.
