पुणे / नगर सह्याद्री –
लोकसभा निवडणुकीत पक्षफोडी करणाऱ्या भाजपला जनतेने नाकारले आहे. तीच जनता विधानसभेतही भाजप व त्यांच्या मित्र पक्षांना कोणत्याही स्थितीवर सत्तेवर येऊ देणार नाही. मी राज्यभर दौरे केले असून राज्यात सत्तांतर होणारच, ही काळ्या दगडावरची पांढरी रेष आहे.
शेतकरी आत्महत्या, बेरोजगारी आणि महिलांवरील अत्याचार रोखण्यास अपयशी ठरलेल्या भाजपला खड्या सारखे बाजूला करा, सत्ताधारी पक्षांवर असे टीकास्त्र सोडून आपल्या विचारांच्या महाविकास आघाडी सरकारला विजयी करण्याचे आवाहन राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी केले.
महाविकास आघाडीचे राष्ट्रवादी काँग्रेस शरदचंद्र पवार पक्षाचे अधिकृत उमेदवार प्रशांत सुदाम जगताप यांच्या प्रचाराच्या निमित्ताने आयोजित सभेत ते बोलत होते. यावेळी माजी खासदार वंदना चव्हाण, प्रभारी शहर अध्यक्ष अंकुश काकडे, माजी राज्यमंत्री बाळासाहेब शिवरकर, जिल्हाध्यक्ष जगन्नाथ शेवाळे, माजी आमदार जयदेव गायकवाड, रवींद्र माळवदकर, संजय मोरे, प्रवीण तुपे, समीर तुपे, नीलेश मगर, योगेश ससाणे, दिलीप तुपे, मोहसीन शेख, सुभाष वारे, रत्नप्रभा जगताप, विजय देशमुख, बंडूतात्या गायकवाड, अनिल तुपे, नमेश बाबर, सक्षणा सलगर, प्राची आल्हाट, कुमार तुपे आदी उपस्थित होते.
शरद पवार म्हटले की, लोकसभेत देशभर पंतप्रधान 400 जागा निवडून द्या अशी मागणी करत होते. पन्नास टक्के जागा निवडून आल्या की सरकार स्थापन होते. पण भाजपला 400 जागा कशासाठी हव्या होत्या? असा प्रश्न पडला होता. त्यावेळी आम्ही खोलात गेलो, मग कळले संविधान बदलायचे आहे, असा हल्लाबोल शरद पवार यांनी केला.
“राज्यामध्ये २०१९ मध्ये त्या पावसाच्या सभेनंतर फक्त पवार साहेबांचा चेहरा पाहून लोकांनी आत्ताच्या आमदारांना निवडून दिले. पण, सव्वा वर्षांपूर्वी त्याच पवार साहेबांना सोडून जाण्याचे पाप त्या आमदारांनी केले, त्यामुळे तुम्ही ठरवायचंय की या मतदारसंघात गद्दारी करणाऱ्या आमदाराला निवडून द्यायचे की संघर्ष करणाऱ्या साहेबांना साथ द्यायची.” – प्रशांत जगताप, उमेदवार, महाविकास आघाडी.
