Maharashtra Crime News: महिलांनी डोळ्यात मिरची पावडर फेकली तर टोळक्याने कोयत्याने सपासप वार करत युवकाची हत्या केल्याचा भयंकर प्रकार शहरात घडला आहे. विशांत भोये (29) असे मृत तरुणाचे आहे. या प्रकरणी पंचवटी परिसरातील आडगाव पोलीस ठाण्यात गुन्हा दाखल करण्यात आला आहे. खुनाच्या घटनेने पंचवटी परिसर हादरला आहे
अधिक माहिती अशी: नाशिक शहरातील पंचवटीमध्ये काल रात्री सव्वा दहा ते साडे दहाच्या सुमारास बिडी कामगारनगर येथील स्वामी समर्थ केंद्राजवळ विशांत भोये आपल्या मित्रांसोबत गप्पा मारत उभा होता. यावेळी त्याठिकाणी अचानक काही महिला आल्या आणि त्यांनी विशांत व त्याच्यासोबत उभ्या असलेल्या मित्रांच्या डोळ्यात मिरचीची पूड फेकली.
त्यानंतर आठ ते दहा जणांच्या टोळक्याने विशांतवर हल्ला केला. यातील एका संशयिताने विशांतला थेट कोयत्याने छातीवर वार केला. यावेळी विशांत जमिनीवर धारातीर्थ पडला. विशांतला त्याच्या मित्रांनी तत्काळ उपचारार्थ खाजगी रुग्णालयात दाखल केले. मात्र त्याच्या छातीवर वर्मी घाव लागल्याने डॉक्टरांनी त्यास मृत घोषित केले.
दोन दिवसांपूर्वी लहान मुलांच्या किरकोळ कारणावरून किरकोळ वाद झाला होता, त्यातून खून झाल्याची चर्चा नागरिकांमध्ये सुरू होती. याप्रकरणी आडगाव पोलीस ठाण्यात गुन्हा दाखल करण्यात आला आहे. अधिक तपास पोलीस करीत आहे. पंचवटी मध्ये मागील आठवड्यात पोलीस उपनिरीक्षकावर हल्ला करण्यात आला होता. या घटनेने परिसर हादरला आहे.
