अहमदनगर। नगर सहयाद्री
युवतीच्या होणार्‍या पतीला मेसेज करून लग्न मोडल्याची घटना समोर आली आहे. नगर शहरातील युवतीने दिलेल्या फिर्यादीवरून रविवारी (दि. २८) तोफखाना पोलीस ठाण्यात तरूणाविरोधात गुन्हा दाखल करण्यात आला आहे.
दीपक गणेश चौरे (रा. शेंडी-पोखर्डी, ता. नगर) असे गुन्हा दाखल झालेल्या तरूणाचे नाव आहे. फिर्यादी युवती फेब्रुवारी २०२३ पासून एका सरकारी रूग्णालयात नोकरी करत असताना त्यांची दीपक सोबत ओळख झाली होती. त्यांच्यात मैत्री झाल्याने ते एकमेकांशी बोलत होते, सोबत फोटोही काढले होते. दरम्यान युवतीचा सोनई (ता. नेवासा) येथील तरूणाशी विवाह जमल्याने तिने दीपक सोबत बोलणे बंद केले होते.
तरीही दीपक युवतीला, ‘प्रेम आहे, लग्न कर’ म्हणून जवळीक साधत होता. त्याने युवतीच्या होणार्‍या पतीला, ‘तू कशाला आमच्या मध्ये पडतो, तू तिच्याशी लग्न करू नकोस’, असे मेसेज करून लग्न मोडले. तसेच युवती शनिवारी (दि. २७) दिल्लीगेट परिसरातून जात असताना दीपकने तिचा हात पकडून गैरवर्तन केल्याचे फिर्यादीत म्हटले आहे.
