अहिल्यानगर । नगर सहयाद्री-
संगमनेरमध्ये विखे आणि थोरात यांच्यातील वादाचा दोन दिवसापूर्वीच भडका उडाला होता. धांदरफळ येथील सभेत जयश्री थोरात यांच्याबद्दल वसंत देशमुख यांनी आक्षेपार्ह विधान केल्यामुळे वाद चिघळला होता. तसेच संगमेनरमध्ये जमावाने तोडफोड आणि जाळपोळ केली होती. आता याप्रकरणी खा. भाऊसाहेब वाकचौरे यांच्यासह ५० जणांविरोधात गुन्हा दाखल कऱण्यात आला आहे.
धांदरफळ येथील विखेंच्या सभेतून महिलांचा अवमान झाल्याचा आरोप करत थोरात समर्थक कार्यकर्ते आक्रमक झाले होते. त्याचे तीव्र पडसाद तालुक्यात उमटले. काही गाड्यांची चिखली परिसरात तोडफोड करत जाळपोळ केल्याची माहिती देखील समोर आली होती. तसेच जयश्री थोरात यांच्यसह समर्थकांनी वादग्रस्त वक्तव्य करणाऱ्या वसंत देशमुख यांच्याविरोधात गुन्हा दाखल कऱण्यात यावा, या मागणीसाठी संगमनेर पोलीस स्टेशनसमोर रात्रभर ठिय्या आंदोलन केले होते.
आता याप्रकरणी आचारसंहिता भंग करत जमावबंदी आदेशाचे उल्लंघन केल्याप्रकरणी जयश्री थोरात जयश्री थोरात, खासदार भाऊसाहेब वाकचौरे, माजी आमदार डॉ. सुधीर तांबे, दुर्गा तांबे यासह 50 जणांवर गुन्हा दाखल करण्यात आला आहे. यामुळे पुन्हा संगमनेरमधील राजकीय वातावरण आणखी पेटण्याची शक्यता वर्तवण्यात येत आहे.
