Crime News कल्याणीनगर येथे निवासी भागात सुरू असलेल्या वेश्याव्यवसायाचा येरवडा पोलिसांनी पर्दाफाश केला. या प्रकरणी पोलिस अंमलदाराने दिलेल्या तक्रारीत लॉजमालकासह तिघे संगनमताने वेश्याव्यवसाय चालवीत असल्याचे म्हटले असूनही, पोलिसांनी केवळ दोघांवर गुन्हा दाखल केला आहे.
येरवडा पोलिस ठाण्याच्या हद्दीत कल्याणीनगर येथे ‘स्प्रिंग ब्रुक लॉज’ मध्ये वेश्याव्यवसाय सुरू असल्याची माहिती येरवडा पोलिसांनी मिळाली. पोलिस निरीक्षक विजय ठाकर यांच्या सूचनेननुसार येरवडा पोलिसांच्या पथकाने या ठिकाणी छापा टाकून कारवाई केली.
लॉजचे व्यवस्थापक अमोल तांबडे (वय २८, रा. श्रीरामपूर, अहिल्यानगर) आणि एजंट बंटी या दोघांना अटक करण्यात आली. या प्रकरणी आरोपींवर भारतीय न्याय संहिता २०२३ सह, अनैतिक व्यापार प्रतिबंध अधिनियम १९५६ च्या विविध कलमांनुसार गुन्हा दाखल करण्यात आला आहे.
लॉजच्या खोली क्रमांक १०२ मध्ये एक २६ वर्षीय पीडित तरुणी आढळून आली. तिला आरोपींनी जबरदस्तीने व्यवसायासाठी ठेवले होते. पोलिसांनी तिला ताब्यात घेऊन पुनर्वसनासाठी पाठविले आहे. दरम्यान, पोलिसांनी छाप्यादरम्यान गुन्ह्याशी संबंधित काही पुरावे जप्त केले. लॉजमध्ये असलेल्या नोंद वहीमध्ये संशयास्पद नोंदी आढळून आल्या.
पोलिसांना संबंधित लॉजवर छापा टाकण्यापूर्वी दोन पंचांना पाचारण केले होते; तसेच बनावट ग्राहकाकडे सात हजार रुपये रोख दिले होते. पोलिसांनी छापा टाकला तेव्हा बनावट ग्राहकाकडील सात हजार रुपये आरोपींकडे सापडले. त्या नोटांचे नंबरही जुळले आहेत, असे तक्रारीत नमूद करण्यात आले आहे.
