आ. जगताप यांनी घेतली हिट अँड रन घटनेतील मयत तरुणाच्या कुटुंबियांचे भेट
अहिल्यानगर । नगर सहयाद्री:-
शहरातील महात्मा फुले चौकामध्ये सोमवार दि. २५ नोव्हेंबर रोजी सायंकाळी एका चार चाकी चालकाचा आपल्या गाडीवरील ताबा सुटला आणि त्याने रस्त्याच्या बाजूला उभे असणाऱ्या नागरिकांना चिरडल्याची घटना घडली, यामध्ये सारसनगर येथील कानडे मळ्यातील रवींद्र रमेश कानडे या 30 वर्षीय युवकाचा दुर्दैवी मृत्यू झाला.
दरम्यान आमदार संग्राम जगताप यांना ते मुंबईत असताना या घटनेची माहिती मिळली असता ते तात्काळ नगरला आले व त्यांनी कानडे कुटुंबियांची भेट घेत सांत्वन करत हिटअँड रन करणाऱ्या व्यक्तीवर कडक कारवाई करण्याच्या सूचना पोलिसांना दिल्या आहेत.
या अशा घटनेमध्ये एखाद्या कुटुंबातील कर्ता पुरुष दुर्दैवी मृत्युमुखी पडल्यास त्या कुटुंबावर मोठे संकट कोसळत असते त्यांचा आधार निघून जाण्याचे काम होत असते, अशा घटना वारंवार घडण्याचे प्रमाण मोठ्या प्रमाणात वाढले आहे.
याबाबत विविध उपाययोजना होणे गरजेचे आहे यासाठी राज्य सरकारकडे पाठपुरावा केला जाईल असे आमदार संग्राम जगताप यांनी सांगितले, यावेळी माजी नगरसेवक प्रकाश भागानगरे उपस्थित होते.
