अहमदनगर । नगर सहयाद्री:-
जिल्ह्यातील पांढरीपूल घाटातील तीव्र उतारावरून भरधाव जाणाऱ्या ट्रकने सहा वाहनांना उडविले. अपघातात २० जण जखमी झाल्याची घटना सोमवारी (दि. २९) घडली. पांढरीपूल घाटातील तीव्र उतारावरून छत्रपती संभाजीनगरकडे जाणाऱ्या ट्रकने (क्र. एमएच १६ सीसी ४३४३) पांढरी पूल येथे समोर जात असलेल्या चार कार, एक मालवाहतूक टेम्पो व एक दुचाकीस धडक दिली.
अपघातानंतर महामार्गावर सर्वत्र जखमींचा आरडाओरडा सुरू होता. त्यामुळे एकच गोंधळ उडाला होता. धडक एवढ्या जोराची होती की दोन कार रस्त्याच्या विरुद्ध दिशेने फेकल्या गेल्या. अपघातात सर्वच वाहनांचे मोठे नुकसान झाले. अपघातात काही गंभीर जखमी झाले आहेत, तर काहींना किरकोळ मार लागला आहे.
घाटातील तीव्र उतारावर ट्रकचालकाचे वाहनावरील नियंत्रण सुटल्याने अपघात घडल्याची माहिती मिळत आहे. अपघातानंतर ट्रकचालक ट्रक दोन किलोमीटर अंतरावरील हॉटेलवर पार्किंग करून फरार झाला. घटनास्थळी सोनई पोलिस ठाण्याच्या पोलिसांनी धाव घेत वाहतूक सुरळीत केली. जखमींवर नगर येथील खासगी तसेच काहींवर शासकीय रुग्णालयात उपचार सुरू आहेत.
