अहमदनगर / नगर सहयाद्री :
पावसाची कमतरता, कमी खरीप पिकांची झालेली दुरवस्था भुसार मालाकडे शेतकऱ्यांनी फिरवलेली पाठ यामुळे ज्वारीला सोन्याचे दिवस आलेत. ज्वारीच्या किमती गगनाला भिडल्या आहे. यंदा ज्वारीच्या किमती अगदी ७ हजार रुपये क्विंटल पर्यंत गेल्या आहेत. पाथर्डी बाजरात बुधवारी (दि.१३ डिसेंबर) ज्वारी ७१०० रुपये क्विंटल विकली गेली. ज्वारीसोबतच गहू व बाजरीच्या किमती देखील वाढल्या आहेत.
* नगदी पिके घेण्यावर भर
पावसाच्या लहरीपणामुळे, मजुरांच्या समस्येमुळे शेतकरी नगदी पिके घेण्यावर भर देत आहे. सध्या शेतकऱ्याने भुसार मालाकडे पाठ फिरवली आहे. आगामी काळात धान्य टंचाईची तीव्रता अधिक वाढून ज्वारी साधारण ९ हजार रुपये क्विंटल पर्यंत जाईल अशी शक्यता आहे. वर्षभरापासून ज्वारी, बाजरी व गव्हाच्या क्षेत्रात मोठी घट झाली असून ऊस, कापूस, तूर, सोयाबीन या नगदी पिकांकडे शेतकरी वळले आहेत. सध्या माल थोडा आहे. ज्यांच्याकडे थोडाफार माल आहे, ते विक्रीला आणायला तयार नसल्याने माल कमी व मागणी जास्त झाली आहे.
* ज्वारीसह गहू , बाजरी देखील महागली
ज्वारीचे भाव तर गगनाला भिडले आहेतच. सोबतच गव्हासह बाजरीचे भावही कडाडले आहेत. आठवडे बाजारात बाजरी ३०००, तर गहू साडेतीन हजार रुपयांपर्यंत वाढले आहेत.
