अहिल्यानगर । नगर सहयाद्री:-
अहिल्यानगर महानगरपालिकेच्या कचरा संकलन व्यवस्थेचा पूर्णपणे बोजवारा उडाला असून शहरातील अनेक भागांमध्ये नागरिकांना स्वतःचा घरगुती कचरा दिवसेंदिवस साठवून ठेवण्याची नामुष्की ओढवली आहे. रस्त्यांवर मोठमोठे कचऱ्याचे ढीग साचले असून त्यामुळे परिसरात प्रचंड दुर्गंधी व अस्वच्छता निर्माण झाली आहे. मनपा आयुक्त यांनी पाईपलाईन रोड व पद्मानगर परिसराची पाहणी केली. त्या दरम्यान नागरिकांनी थेट प्रश्नांचा भडिमार केला. विशेषतः महिलांनी आयुक्त साहेब, कचरा टाकू तरी कुठे? असा थेट सवाल करत प्रशासनाची झोप उडवली.
या परिसरातील रहिवाशांच्या मते, मागील अनेक दिवसांपासून कचरा उचलण्याची कोणतीही ठोस कारवाई झालेली नाही. त्यामुळे अस्वच्छतेमुळे मोकाट कुत्र्यांचा त्रास, डासांचे प्रमाण आणि दुर्गंधी यामध्ये कमालीची वाढ झाली आहे. याचा परिणाम लहान मुलं, वृद्ध आणि आजारी व्यक्ती यांच्या आरोग्यावर होत आहे. माजी नगरसेवक निखिल वारे यांनी मागील आठवड्यात कचरा संकलनाबाबत आवाज उठविला.
महापालिकेने गेल्या तीन महिन्यांपासूनचा कचरा संकलन कर घेऊ नये. कारण महापालिकेकडून कचऱ्याच्या संदर्भात कुठल्या ही सुविधा मिळत नाहीत.लवकरात लवकर महापालिकेने स्वच्छतेसंबंधी ठोस पावले उचलावीत. दररोज नागरिकांच्या घरोघरी जाऊन घंटागाडी द्वारे कचऱ्याचे संकलन करावे. महानगरपालिका प्रशासनाने या समस्येकडे गांभीर्याने लक्ष देऊन, कचरा संकलन व विल्हेवाट व्यवस्था तातडीने पूर्ववत करावी. अशी मागणी आयक्त डांगे यांच्याकडे करण्यात आली.
‘नवीन एजन्सीकडे कचरा संकलनाची जबाबदारी देऊ’
आयुक्त यशवंत डांगे म्हणाले की, शहरातील कचरा संकलन व्यवस्थेतील अडचणींची आम्ही गंभीर दखल घेतली आहे. सध्या कार्यरत असलेल्या कचरा संकलन एजन्सीच्या कार्यक्षमतेबाबत अनेक तक्रारी प्राप्त झाल्यानंतर निर्णय घेण्यात आला आहे की, ही एजन्सी हटवून नव्या एजन्सीकडे कचरा संकलनाची जबाबदारी सोपवली जाईल. नवीन एजन्सीसोबत कामकाजाचा आराखडा अंतिम टप्प्यात असून, लवकरच शहरात नियमित, वेळेवर आणि यंत्रबद्ध कचरा संकलन सुरू होईल. नागरिकांनी पालिकेवर विश्वास ठेवावा, आम्ही लवकरच समाधानकारक बदल करून दाखवू असे प्रतिपादन आयुक्त यशवंत डांगे यांनी केले.
