Accident News: कळमेश्वर तालुक्यातील महाजन लेआउट परिसरात शुक्रवारी सकाळी एक अत्यंत दुर्दैवी घटना घडली. शाळेच्या बसच्या धडकेत एका चार वर्षांच्या चिमुकल्याचा जागीच मृत्यू झाला. या घटनेने संपूर्ण परिसरात हळहळ व्यक्त केली जात असून, लोकांमध्ये संतापाचे वातावरण आहे.
मृत बालकाचे नाव पार्थ पंकज कांडलकर (वय ४) असून तो आपल्या आईसोबत बहिणीला शाळेच्या बसपर्यंत सोडण्यासाठी गेला होता. पार्थची बहीण गार्गी कांडलकर सेंट जोसेफ स्कूल, फेटरी येथे तिसऱ्या वर्गात शिक्षण घेत आहे.
नेहमीप्रमाणे पार्थची आई गार्गीला बसमध्ये बसवण्यासाठी घेऊन गेली असता, पार्थ अचानक मागून धावत आला. त्या क्षणी एमएच ४० सीटी ४३९० क्रमांकाच्या स्कूल बसचा चालक गाडी सुरू करत होता. दुर्लक्षामुळे पार्थ थेट बसच्या मागील चाकाखाली आला.
या भीषण अपघातात पार्थच्या डोक्याला गंभीर दुखापत झाली. तात्काळ त्याला कळमेश्वर येथील पोतदार मल्टीस्पेशालिटी रुग्णालयात नेण्यात आले. मात्र डॉक्टरांनी त्याला मृत घोषित केले. पार्थ हा आपल्या कुटुंबातील एकुलता एक मुलगा होता. त्याचे वडील जिल्हा परिषद शाळेत शिक्षक म्हणून कार्यरत आहेत.
या घटनेमुळे कुटुंबावर शोककळा पसरली असून संपूर्ण परिसरात शोकाकुल वातावरण आहे. घटनेनंतर पालकांनी कळमेश्वर पोलिस ठाण्यात बस चालकाविरुद्ध गुन्हा दाखल केला आहे. पोलिसांनी पुढील तपास सुरू केला आहे. ही दुर्दैवी घटना बस चालकाच्या निष्काळजीपणाचे परिणाम दर्शवते. याप्रकरणी संबंधित चालकाला काय शिक्षा होते याकडे सर्वांचे लक्ष लागून राहिले आहे.
