अहिल्यानगर । नगर सहयाद्री:-
अहिल्यानगर जिल्ह्यातील एमआयडीसी पोलीस स्टेशन आणि सैन्य कमांड मिलिट्री इंटेलिजन्स यांच्या संयुक्त कारवाईत तीन बांगलादेशी घुसखोरांना अटक करण्यात आली आहे. पोखर्डी गावातील वारुळे वस्ती येथील खडी क्रशरजवळील सिमेंट बांधकामाच्या खोलीतून एमआयडीसी पोलिसांनी आणि सैन्य कमांड मिलिट्री इंटेलिजन्सच्या सहकार्याने ही कारवाई केली. यात बनावट आधार कार्ड, पॅन कार्ड आणि इतर कागदपत्रे जप्त करण्यात आली.
एमआयडीसी पोलिसांना गुप्त माहिती मिळाली की, पोखर्डी गावात काही बांगलादेशी नागरिक अवैधपणे राहत आहेत. यानंतर सपोनि माणिक बी. चौधरी यांच्या नेतृत्वाखाली एमआयडीसी पोलीस आणि सैन्य कमांड मिलिट्री इंटेलिजन्स यांनी संयुक्त छापा टाकला. यात संशयित जहांगिर अवुताहेर शेख (वय ३४, रा. चट्टोग्राम, बांगलादेश), हनीफ अब्दुल खलीद शेख (वय ४०, रा. शेनबाग, बांगलादेश) आणि मुश्रफ हवीव शेख (वय ४०, रा. चट्टोग्राम, बांगलादेश) यांना ताब्यात घेतले.तपासात या तिघांकडे भारतात राहण्यासाठी कोणताही व्हिसा किंवा परवानगी नसल्याचे एमआयडीसी पोलिस आणि सैन्य कमांड मिलिट्री इंटेलिजन्सने उघड केले.
त्यांच्याकडील कागदपत्रे बनावट असल्याचे आढळले. एमआयडीसी पोलिसांनी गुन्हा दाखल करून पुढील तपास सुरू केला आहे.ही कारवाई पोलीस अधीक्षक सोमनाथ घार्गे, अपर पोलीस अधीक्षक प्रशांत खैरे आणि उपविभागीय पोलीस अधिकारी अमोल भारती यांच्या मार्गदर्शनाखाली झाली. एमआयडीसी पोलीस आणि सैन्य कमांड मिलिट्री इंटेलिजन्स यांच्या पथकात मनोज मोंढे, राकेश खेडकर, राजू सुद्रीक, किशोर जाधव, सुरज देशमुख, जयसिंग शिंदे, शेरकर, दहिफळे आणि मोबाइल सेलचे राहुल गुंडू यांचा समावेश होता.
