शरद पवार यांच्या गटाला हादरा बसणार!! तुतारी’ सोडून ‘बडा’ नेता ‘कमळ’ हाती घेणार?

जळगाव । नगर सहयाद्री-
राष्ट्रवादी काँग्रेस पार्टी शरदचंद्र पवार पक्षाचे ज्येष्ठ नेते एकनाथ खडसे लवकरच भाजपत स्वगृही परतणार असल्याचा दावा केला जात आहे. एकनाथ खडसे रविवारी रात्री अचानक दिल्लीला रवाना झाल्यामुळे जळगावच्या राजकीय वर्तुळात अशी चर्चा सुरू झाली आहे. यामुळे लोकसभा निवडणुकीच्या ऐन तोंडावर राष्ट्रवादीच्या शरद पवार गटाला मोठा हादरा बसण्याची शक्यता आहे.

जळगाव जिल्ह्यातील मंत्री गिरीश महाजन व उपमुख्यमंत्री देवेंद्र फडणवीस यांच्याशी असलेल्या वादामुळे एकनाथ खडसे यांनी भाजपला सोडचिठ्ठी दिली होती. त्यानंतर ऑक्टोबर 2020 मध्ये त्यांनी राष्ट्रवादी काँग्रेस पक्षात प्रवेश केला. शरद पवार यांनी त्यांना विधान परिषदेची उमेदवारी दिली. त्यानंतर अजित पवार यांनी राष्ट्रवादीत बंडखोरी केली.

ते भाजपबरोबर गेले, पण खडसे यांनी शरद पवारांसोबतच राहणे पसंत केले. गत काही दिवसांपासून एकनाथ खडसे भाजपत परतणार असल्याची चर्चा राज्याच्या राजकारणात रंगली आहे. पण खडसे यांनी वेळोवेळी हीच चर्चा फेटाळून लावली. पण आता एकनाथ खडसे लवकरच राष्ट्रवादीच्या शरद पवार गटाची तुतारी सोडून भाजपचे कमळ हातात घेणार असल्याची माहिती आहे.