पारनेर। नगर सहयाद्री
पारनेर तालुक्यातील खडकवाडी परिसरातून अवैध वाळू वाहतूक करणाऱ्या एका संशयिताला स्थानिक गुन्हे शाखेच्या पथकाने जेरबंद केले आहे. या कारवाईत १५ लाख ४० हजार रुपये किमतीचा मुद्देमाल हस्तगत करण्यात आला आहे. ताब्यात घेतलेल्या संशयिताचे नाव रोहित शाहूराज साळवे (वय २६, रा. कासारे, ता. पारनेर, जि. अहिल्यानगर) असे आहे.
स्थानिक गुन्हे शाखेच्या पथकाने गुप्त माहितीच्या आधारे खडकवाडी परिसरात सापळा रचून ही कारवाई केली. संशयित रोहित साळवे याच्याकडून अवैध वाळूने भरलेला डंपर जप्त करण्यात आला. चौकशीदरम्यान, साळवे याने अमोल रक्टे (पूर्ण नाव माहित नाही, फरार) आणि डंपर मालक बापू बोरूडे यांची नावे उघड केली. याप्रकरणी पारनेर पोलीस ठाण्यात तिघांविरुद्ध गुन्हा दाखल करण्यात आला आहे.या कारवाईत स्थानिक गुन्हे शाखेचे पोलीस अंमलदार गणेश लोंढे, संदीप दरंदले, विशाल तनपुरे, रमीज आत्तार आणि मनोज लातुरकर यांच्या पथकाने महत्त्वपूर्ण भूमिका बजावली.
अवैध वाळू वाहतुकीमुळे पर्यावरणाला होणारे नुकसान आणि स्थानिक प्रशासनाला बसणारा आर्थिक फटका लक्षात घेता, अशा कारवायांना गती देण्याचे प्रयत्न सुरू असल्याचे पोलीस अधिकाऱ्यांनी सांगितले.पारनेर तालुक्यात अवैध वाळू वाहतूक हा गंभीर समस्या बनला आहे. यापूर्वीही अशा कारवाया झाल्या असून, प्रशासनाने कठोर पावले उचलण्याचे संकेत दिले आहेत. पुढील तपास पारनेर पोलीस करत असून, फरार संशयितांचा शोध घेण्यासाठी विशेष पथके तयार करण्यात आली आहेत.
