संगमनेर । नगर सहयाद्री:-
श्री हनुमान जयंती निमित्त महाराष्ट्रातील विविध ठिकाणी व मंदिरांमध्ये हनुमान जन्मोत्सव साजरा करण्यात आला. हनुमान जयंतीनिमित्त राज्यात उत्साह पाहायला मिळाला. अनेक ठिकाणी मिरवणुका काढल्या. याच उत्साहाच्या वातावरणाला गालबोट लागलेत. अहिल्यानगर जिल्ह्यातील संगमनेरमध्ये हनुमान जयंतीच्या मिरवणुकीत जोरदार राडा झाला. आमदार आणि पोलिसांसमोरच राडा झाल्यामुळे याची नगरमध्ये जोरदार चर्चा होत आहे.
अहिल्यानगरच्या संगमनेर शहरात हनुमान मिरवणुकीत जोरदार राडा पाहायला मिळाला. पोलीस आणि आमदारांसमोरच हनुमान रथ मिरवणुकीत जोरदार राडा झाला आहे. आयोजक आणि ढोल वादक या मिरवणुकीत भिडले. हनुमान रथासमोर ढोल वादनावरून हा वाद झाल्याची प्राथमिक माहिती मिळत आहे.
स्थानिक आमदार अमोल खताळ आणि पोलिसांसमोरच हनुमान मिरवणुकीत जोरदार राडा झाला. ऐन मिरवणुकीत जोरदार राडा झाल्यामुळे काहीकाळ तणाव निर्माण झाला होता. पोलिसांनी हस्तक्षेप करत आयोजक आणि ढोल वादक यांच्यातील वाद मिटवला. वाद निवळल्यानंतर पोलिस बंदोबस्तात पारंपरिक पद्धतीने रथ मिरवणूक संपन्न झाली.
श्रीरामपुरात श्री हनुमान जन्मोत्सव सोहळा उत्साहात
शहरातील रेल्वे स्टेशन परिसरात असलेल्या जागृत देवस्थान हनुमान मंदिरात मोठ्या भक्तीमय वातावरणात श्री हनुमान जन्मोत्सव साजारा करण्यात आला. आज, 12 एप्रिल 2025 रोजी सकाळी 6 वाजता श्री हनुमान जन्मोत्सव सोहळा भक्तिमय वातावरणात पार पडला.या पवित्र प्रसंगी हजारो भाविकांनी मंदिरात गद करत महाआरती, अभिषेक आणि हनुमान चालिसा पठणामध्ये सहभाग घेतला. मंदिर परिसर भक्तीमय भजनी रंगला असताना हनुमान जन्मोत्सवानिमित्त पाळण्याची दोरी ओढण्याचा विशेष सोहळा आयोजित करण्यात आला होता.यावेळी श्रीरामपूर विधानसभा मतदारसंघाचे आमदार हेमंत ओगले, राजश्री ससाणे, संजय फंड, ज्ञानेश्वर मुरकुटे, वंदना मुरकुटे, नीरज मुरकुटे, मणीलाल पोरवाल, सुनील गुप्ता, योगेश गुप्ता, अरुण गुप्ता यांच्यासह अनेक मान्यवर उपस्थित होते. भाविकांनी मंदिरात दर्शनासाठी रांगा लावल्या. तर मंदिर परिसरात भक्तीगीते आणि हनुमान चालिसाच्या सामूहिक पठणाने आध्यात्मिक वातावरण निर्माण झाले. हा सोहळा सर्वांसाठी अविस्मरणीय ठरला असून, श्री हनुमानाच्या कृपेने सर्वांच्या मनोकामना पूर्ण होवोत, अशी प्रार्थना यावेळी भक्तांकडून करण्यात आली.
