पारनेर | नगर सह्याद्री
पारनेर तालुक्यातील कर्जुले हर्या आणि कासारे परिसरात रविवारी दि. 8 जून रोजी सायंकाळी ढगफुटीसदृश मुसळधार पाऊस कोसळला. या अचानक आलेल्या पावसाने नाले-ओढे तुडुंब भरून वाहू लागले, तर परिसरात पाणीच पाणी झाले.
जोरदार पावसामुळे शेतकऱ्यांमध्ये आनंदाचे वातावरण पसरले. पेरणी केलेल्या पिकांना पावसाचा मोठा फायदा होणार आहे. मात्र, साठवणूक केलेल्या कांदा पिकाचे मोठ्या प्रमाणात नुकसान झाले. त्यामुळे शेतकऱ्यांमध्ये चिंताही पसरली आहे. या पावसाने काही ठिकाणी रस्त्यांवर पाणी साचल्याने वाहतूकही अडचणीची ठरत होती. हवामान खात्याने पुढील काही दिवस पावसाचा अंदाज वर्तवला आहे.
शेतकऱ्यांनी कांदा आणि इतर पिके सुरक्षित ठिकाणी हलवण्याचे आवाहन प्रशासनाने केले आहे. या नैसर्गिक आपत्तीमुळे शेतकऱ्यांना आर्थिक नुकसान सहन करावे लागले असले, तरी पावसामुळे जमिनीतील ओलावा वाढल्याने खरिपाच्या पिकांसाठी दिलासा मिळाला आहे. नुकसान झालेल्या पिकांना नुकसान भरपाई म्हणून प्रशासनाकडून तातडीने मदत मिळावी, अशी मागणी शेतकऱ्यांकडून केली जात आहे.
