राहता । नगर सहयाद्री:-
माझा विजय मतदारसंघातील जनतेला समर्पित आहेत. सुजयने माझ्यासाठी खूप मेहनत घेतली. खरंतर महायुतीचे सरकार बनण्यामागे लाडक्या बहिणींचा मोठा हात आहे. देवेंद्र फडणवीस मुख्यमंत्री व्हावेत, अशी आमची इच्छा असल्याची प्रतिक्रिया भाजप नेते राधाकृष्ण विखे पाटील यांनी दिली आहे.
राज्यात विधानसभा निवडणुकीच्या मतमोजणीत महाविकास आघाडीला मोठा धक्का बसला आहे. मतमोजणीच्या सुरुवातीच्या कलात महायुतीने महाविकास आघाडीला मोठा धक्का दिला आहे. महाविकास आघाडीच्या दिग्गज नेत्यांना फटका बसताना दिसत आहे.
महायुतीने थेट विजयाकडे वाटचाल सुरु केली आहे. राज्याच्या निवडणुकीचे मतमोजणीत महायुतीचे २१७ उमेदवार आघाडीवर आहेत. महायुतीच्या अनेक उमेदवारांनी विजयाकडे वाटचाल केली आहे. शिर्डीतही भाजपचे राधाकृष्ण विखे पाटील आघाडीवर आहेत. विखे पाटील बाराव्या फेरी अखेर ३४,७९९ मतांनी आघाडीवर आहेत.
तर काँग्रेसच्या प्रभावती घोगरे पिछाडीवर आहेत. राधाकृष्ण विखे पाटील हे आघाडीवर जाताच त्यांच्या कार्यकर्त्यांनी जल्लोषाला सुरुवात केली आहे. यावेळी राधाकृष्ण विखे पाटील आणि सुजय विखे पाटील यांनी हस्तांदोलन करत गळाभेट घेतली.
दरम्यान, नगरमध्येही महायुतीचे उमेदवार आघाडीवर असल्याचे दिसत आहे. नगर शहर मतदारसंघात महायुतीचे संग्राम जगताप आघाडीवर आहेत. तर महाविकास आघाडीचे अभिषेक कळमकर पिछाडीवर आहेत. संगमनेर विधानसभा मतदारसंघातही बाराव्या फेरीनंतर महायुतीचे अमोल खताळ आघाडीवर आहेत.
तर बाळासाहेब थोरात पिछाडीवर आहेत. पारनेर विधानसभा मतदारसंघात महायुतीचे उमेदवार काशिनात दाते आघाडीवर आहेत. आठव्या फेरीत दाते यांना ४७२५ मतांनी आघाडीवर आहेत. तर महाविकास आघाडीच्या राणी लंके पिछाडीवर आहेत.
