अहमदनगर। नगर सहयाद्री-
नगर दक्षिण लोकसभा मतदारसंघ हा भाजपकडे आहे. भाजपचे विद्यमान खासदार डॉ. सुजय विखे यांना उमेदवारी जाहीर झाली आहे. दरम्यान भाजपाच्या अतंर्गत वादामुळे नाराज असलेले आमदार राम शिंदे यांनी मागील पाच वर्षात घडलेल्या विविध घटनांच्या अनुषंगाने उपमुख्यमंत्री देवेंद्र फडणवीस यांच्यासमवेत चर्चा केल्यानंतरच माझी नाराजी कोणत्या मुद्यांवर होती हे स्पष्ट करणार असल्याचे प्रतिपादन केले.
आमदार राम शिंदे यांनी नगरच्या वाडिया पार्कमध्ये आयोजित राष्ट्रीय कबड्डी स्पर्धा सुरु असलेल्या मैदानावर सामने पाहण्याचा आनंद घेतला. यावेळी त्यांनी माध्यमांशी संवाद साधला यावेळी ते बोलत होते.
आमदार शिंदे म्हणाले, नगर दक्षिणेतून उमेदवारीसाठी मीही इच्छुक होतो, याआधीही दोन निवडणुकांच्या काळात मी इच्छुक होतो. मात्र, आता डॉ. विखे यांना उमेदवारी जाहीर झाली आहे. कोणत्या निकषावर मला उमेदवारी मिळाली नाही, हे मला सांगता येणार नाही. मात्र डॉ. विखेंना उमेदवारी मिळाल्यानंतर मी त्यांना शुभेच्छा देतो व त्यांच्या विजयासाठी पूर्णपणे प्रयत्न करण्याची ग्वाहीही त्यांनी दिली.
पुढे बोलतांना आमदार शिंदे म्हणाले, पालकमंत्री राधाकृष्ण विखे पाटील यांनीही माझ्याशी चर्चा केली. त्या चर्चेत मी काही मुद्दे उपस्थित केले होते. त्या मुद्यांच्या अनुषंगाने त्यांनी उपमुख्यमंत्री फडणवीस यांची मुंबईत भेट घेतल्याचे समजले. मात्र, फडणवीस यांच्याकडून मला अजूनपर्यंत निरोप नाही, पण नाराजी संदर्भात मी उपस्थित केलेल्या मुद्यांवर फडणवीस यांच्या स्तरावरच चर्चा होईल. त्यानंतर ते मुद्दे काय होते ते मी स्पष्ट करेल असेही ते म्हणाले.
