पुणे / नगर सह्याद्री –
चाकण शिक्रापूर रस्त्यावर भरधाव मालवाहतूक करणाऱ्या कंटेनरने दहा ते पंधरा गाड्यांना धडक दिल्याची घटना घडली आहे. तसेच या कंटेनरने तीन महिलांना देखील उडवले आहे. या थरारक घटनेचा व्हिडिओ सोशल मीडियावर व्हायरल झाला आहे. अपघातानंतर कंटेनर चालकाने घटनास्थळावरून पळ काढला. पोलिसांनी चालकाला पाठलाग करून पकडून त्याला ताब्यात घेतले आहे. या अपघातामध्ये अनेकजण जखमी झाले आहेत. प्राथमिक माहितीनुसार या दुर्देवी घटनेत एकचा मृत्यू झाला आहे.
मिळालेल्या माहितीनुसार, चाकणमधील माणिक चौकात कंटेनर चालकाने तीन महिलांना उडवले, मग पळून जाण्याच्या हेतूने तो भरधाव वेगात निघाला. पोलिसांनी पाठलाग सुरु केला, हे पाहून त्याने इतर वाहनांना धडक दिली. तसेच एका ठिकाणी पोलीस त्याला पकडण्यासाठी उभे होते, तेव्हा पोलिसांच्या वाहनाला सुद्धा या चालकाने उडवले. या थरारक घटनेचा व्हिडीओ समोर आला आहे. चाकण, रासे, शेलगाव, पिंपळगाव आणि चौफुला परिसरात एकाच मालवाहतूक करणाऱ्या कंटेनर चालकाने हा प्रताप केला आहे. या अपघातानंतर स्थानिकांनी कंटेनर चालकाला चांगलाच चोप दिला. त्यानंतर त्याला शिक्रापूर पोलिसांनी ताब्यात घेतले आहे. या अपघातामध्ये अनेकजण जखमी झाले आहेत.
