अहमदनगर । नगर सहयाद्री:-
शहरात तपासणीसाठी आलेल्या २१ वर्षीय विद्यार्थिनीवर डॉक्टराने नको त्या ठिकाणी हात लावून अत्याचार केल्याची धक्कादायक घटना समोर आली आहे. या प्रकरणी डॉक्टरासह हॉस्पिटलमधील महिला कर्मचारी यांच्याविरुद्ध गुन्हा दाखल करण्यात आला आहे.
राहाता (साकुरी) येथील विद्यार्थिनी श्रीरामपूर येथे शिक्षणासाठी वसतिगृहात राहते. ५ ऑगस्ट रोजी ती आजारी पडल्यामुळे तिला मैत्रिणी व रेक्टरच्या सोबत नेवासा रस्त्यावरील डॉ. कुटे हॉस्पिटलमध्ये उपचारासाठी नेण्यात आले. हॉस्पिटलमध्ये गेल्यावर तेथील कर्मचारी महिलेने तिला ओपीडीत नेले, जिथे डॉ. रवींद्र कुटे यांनी तपासणीसाठी विचारपूस केली आणि झोपण्यास सांगितले.
तपासणीदरम्यान, डॉ. कुटे यांनी विद्यार्थिनीच्या नको त्या ठिकाणी हात लावून लज्जा उत्पन्न होईल असे वर्तन केले. त्यामुळे घाबरलेल्या विद्यार्थिनीने मदतीसाठी आवाज दिला. तिच्या आवाजाने आलेल्या मैत्रिण व रेक्टरला हॉस्पिटलच्या कर्मचारी महिलेने व डॉक्टरांनी शिवीगाळ केली आणि झाडूने मारले.
या घटनेने घाबरलेल्या विद्यार्थिनींनी श्रीरामपूर शहर पोलीस ठाण्यात फिर्याद दिली. या फिर्यादीवरून डॉ. रवींद्र कुटे आणि महिला कर्मचारी यांच्या विरोधात गुन्हा दाखल करण्यात आला आहे. पोलीस अधिक तपास करत आहेत.
