सुपा शहरातील घटना । सीसीटिव्ही कॅमेर्‍यात कैद
पारनेर । नगर सहयाद्री
पारनेर तालुक्यातील सुपा येथे दोन अनोळखी इसमांनी सोन्याचे दागिने घासुन देण्याचा बहाना करत सुमारे दिड लाखाचे दागिने पळवल्याची घटना घडली आहे. सदरची घटना सीसीटिव्ही कॅमेर्‍यात कैद झाली आहे. याप्रकरणी सुपा पोलीस ठाण्यात संपत तागडे ( रा. सूपा, ता, पारनेर) यांनी फिर्याद दाखल केली आहे.
फिर्यादीत म्हटले आहे की, सोमवार दि. २१ रोजी दुपारी सुपा येथील निवासस्थानी दोन अज्ञात इसमांनी दरवाजाची बेल वाजवली, बाहेर दोन अनोळखी इसम उभे होते. त्यांच्या खांदयावर काळ्या व लाल रंगाची बॅग होती. त्यांनी आम्ही कंपनीचे माणसे असुन भांडी खासण्याची पावडर विकत असल्याचे सांगीतले. त्यांनी घरातील तांब्याचे भाडे घासुन दाखवले. तेवढ्यात पत्नी देखील आली.
तेव्हा त्यातील एकाने तुमच्या बायकोच्या गळ्यातील सोन्याचे दागीने हे काळे पडलेले आहेत ते घासुन देतो असे सांगीतले. त्यानंतर पत्नीने सोन्याचे डोरले, कानातील फुले व वेल, गळ्यातील सोन्याचे गंठण रूमालावर ठेवले. त्यानंतर त्यांनी रूमालावरील सोन्याचे दागिने घेत दोघांनी धूम ठोकली. दरम्यान दागिने चोरणारे इसम हे सुपा ग्रामपंचायतीच्या सीसीटिव्ही कॅमेर्‍यात कैद झाली आहे. पोलिस निरिक्षक अरुण आव्हाड यांच्या मार्गदर्शनाखाली सुपा पोलिस अधिक तपास करत आहेत.
