अहमदनगर। नगर सहयाद्री
ओबीसी समाजाचा ३ फेब्रुवारीला नगरमध्ये ’एल्गार’ मेळावा होत आहे. नगरमधील क्लेरा ब्रुस हायस्कुलच्या ३५ एकर मैदानावर एल्गार मेळावा होणार असून नगर जिल्ह्यासह मराठवाड्यातून तब्बल दोन ते अडीच लाख ओबीसी बांधव येतील अशी माहिती समता परिषदेच्या पदाधिकार्‍यांनी दिली.
मराठा कुणबी नोंदी असलेल्यांच्या सग्यासोयर्‍यांना कुणबी जात प्रमाणपत्र देण्याबाबतच्या अधिसूचनेनंतर मंत्री छगन भुजबळ हे सरकारविरोधात आक्रमक झाले आहेत. मुंबई येथे ओबीसी समाजाच्या नेत्यांची बैठक त्यांनी घेतली. तसेच नगरमध्ये ३ फेब्रुवारीला दुपारी ३ वाजता होत असलेल्या एल्गार मेळावाच्या नियोजनात भुजबळ यांनी त्यांची नाशिक टीमही उतरवली आहे.
समता परिषदेचे प्रदेश सरचिटणीस दिलीप खैरे यांनी या मैदानाची पाहणी केली. यावेळी त्यांच्याबरोबर नाशिकमधील समता परिषदेच्या पदाधिकार्‍यांबरोबर नगरमधील स्थानिक पदाधिकारी देखील उपस्थित होते. काही लोक एल्गार मेळावाच्या एकदिवस अगोदर मुक्कामी असणार आहेत. त्यांच्या जेवणापासून ते मुलभूत सोयीपर्यंत सर्व नियोजन नगरमधील ओबीसी नेते आणि पदाधिकार्‍यांनी केली आहे.
