पारनेर । नगर सहयाद्री
माजी नगराध्यक्ष विजय सदाशिव औटी व अन्य तिघांनी पारनेर नगरपंचायतच्या रजिस्टरला ३५ दुकाने व २५ फ्लॅटची खोटी नोंद लावून फसवणूक केल्याचा धक्कादायक प्रकार समोर आला आहे. त्यामुळे पारनेर नगरपंचायतने विजय औटी विरोधात पोलिसात तक्रार दाखल केली आहे.
विजय औटी, संभाजी बबनराव मगर, विजया भागाची नवले यांनी या नोंदी लावून बनावट दस्त तयार केले आहेत. या संदर्भात नगरपंचायतच्या मुख्याधिकाऱ्यांनी गुन्हा दाखल करण्यासाठी पोलिसांना पत्र दिले आहे. पत्रात म्हटले आहे की, पारनेर नगरपंचायत अंतर्गत येणाऱ्या गट क्रमांक ३९०३, ३५५४/१। ३५४०/१ व ३५४४/२ मिळकत नं. २५९४/२५९५/२५९६ या मिळकतींची स्थळ पाहणी केली असता त्या मिळकतीवर भैरवी अपार्टमेंट नावाची इमारत अस्तित्वात नाही.
मात्र नगरपंचायत मागणी रजिस्टर तथा नमुना नं. ८ वर भैरवी अपार्टमेंट असा उल्लेख करून त्यावर एकूण ३५ शॉप व केली २५ फ्लॅटची बेकायदेशीर नोंद आढळली आहे. सदर नोंद दुय्यम निबंधक यांच्याकडील दस्त ५७१७/२०१५ सुची क्रमांक २ व अर्जावरून नगरपंचायत दप्तरी घेतल्याचे सिद्ध होत आहे. शॉप व फ्लॅट नसतानाही नगरपंचायत प्रशासनाकडे खोटा अर्ज करून बनावट कागदपत्रांच्या आधारे खोट्या नोंदी लावून काहीतरी हेतू साध्य करण्याचा संबंधिताचा प्रयत्न दिसतो असे म्हंटले आहे.
