अहिल्यानगर । नगर सहयाद्री
खंडाळा (ता. अहिल्यानगर) येथील हॉटेल राजयोग येथे सुरू असलेल्या वेश्याव्यवसायावर स्थानिक गुन्हे शाखेने छापा टाकून दोघांना पकडले असून, तीन महिलांची सुटका करण्यात आली आहे. या प्रकरणी अहिल्यानगर तालुका पोलीस ठाण्यात गुन्हा दाखल करण्यात आला आहे. अक्षय अनिल कर्डिले (वय २८, रा. खंडाळा) हा हॉटेल राजयोग येथे महिलांकरवी कुंटणखाना चालवत असल्याची माहिती स्थानिक गुन्हे शाखेच्या पोलिसांना मिळाली होती.
पोलीस अधीक्षक सोमनाथ घार्गे यांच्या आदेशाने पोलीस निरीक्षक दिनेश आहेर यांच्या नेतृत्वाखाली पोलीस निरीक्षक राजेंद्र इंगळे, पोलीस उपनिरीक्षक तुषार धाकराव, पोलीस अंमलदार गणेश धोत्रे, अरूण गांगुर्डे, संतोष खैरे, रवींद्र घुंगासे, भगवान थोरात, सारिका दरेकर व उमाकांत गावडे यांच्या पथकाने सदर ठिकाणी जावून बनावट ग्राहक पाठवून वेश्याव्यवसाय सुरू असल्याची खात्री घेतली. त्यानंतर पंचासमक्ष छापा टाकण्यात आला.
कारवाईदरम्यान, नारायण ठाणप्रसाद भट्टराई (वय २७, रा. कोहलपूर, बाके, नेपाळ) याला ताब्यात घेतले. त्याच्याकडून एक हजार ५०० रूपये रोख रक्कम जप्त करण्यात आले. हॉटेलमधील तपासणीत तिन्ही महिलांची सुटका झाली असून, त्यांनी अक्षय कर्डिले याने वेश्याव्यवसाय करण्यास भाग पाडल्याचे सांगितले. या कारवाईत अक्षय कर्डिले यालाही ताब्यात घेण्यात आले असून त्याच्याकडून एक लाख रूपये किंमतीचा मोबाईल जप्त करण्यात आला आहे. दोघांविरोधात तालुका पोलीस ठाण्यात गुन्हा दाखल करण्यात आला आहे.
