अहिल्यानगर । नगर सहयाद्री:-
अहिल्यानगर–पुणे महामार्गावरिल कामरगाव शिवारात अज्ञात वाहनाच्या धडकेत नर जातीचा बिबट्या ठार झाला.कामरगाव शिवारातील काळ्याच्या डोंगराकडून रस्ता ओलांडत असताना बिबट्याला धक्का लागला, त्यानंतर तो रस्ता पार करून रस्त्याच्या कडे निपचित पडला. ही माहिती नवनाथ ठोकळ यांनी सामाजिक कार्यकर्ते तुकाराम कातोरे यांना दिली, त्यांनी तत्काळ घटनेची माहिती वन विभागाच्या अधिकार्यांना कळवली.
माहिती मिळताच वन परिक्षेत्र अधिकारी अविनाथ तेलोरे यांच्या मार्गदर्शनाखाली वनपाल शैलेश बडदे, वनरक्षक कृष्णा गायकवाड आणि वन कर्मचारी घटनास्थळी दाखल झाले. त्यांनी पंचनामा करून बिबट्याला ताब्यात घेतले व पुढील कार्यवाहीसाठी वन परिक्षेत्र अधिकाऱ्यांच्या कार्यालयाकडे सुपूर्द केले आहे.
यावेळी अहिल्यानगर–पुणे महामार्गावरून जाणाऱ्या वाहनचालकांनी वाहने थांबवून मोठी गर्दी केली होती. मागील काही दिवसापासून या भागात बिबट्यांचा सतत वावर होत असल्याचे नागरिकांनी सांगितले. वन विभागाने शेतकरी आणि जनावरे चारणारे नागरिक यांना काळजी घेन्याचे आवाहन केले आहे.
