Sujay Vikhe-Patil : संगमनेर शहरातील बाळासाहेब थोरात यांच्या घराशेजारील मैदानावर जनसेवा फाऊंडेशनच्या वतीने महिलांसाठी हळदी कुंकू व खेळ पैठणी हा कार्यक्रम आयोजित करण्यात आला होता. या कार्यक्रमाला हजारो महिलांनी हजेरी लावली होती. या कार्यक्रमामध्ये महिलांसाठी मनोरंजनाचा कार्यक्रम देखील आयोजित करण्यात आला होता.
कार्यक्रमानिमित्ताने सुजय विखे आणि आमदार अमो खताळ एकत्र आले होते. यावेळी माजी खासदार सुजय विखे यांनी ‘मुझको पहेचानलो मैं हूँ डॉन’ गाण्यावर जबरदस्त डान्स केला. सुजय विखे यांचे हे टायमिंग अन् डान्स करण्यासाठी निवडलेल्या गाण्यावरून संगमनेरमध्ये चर्चा रंगली आहे.भाजपचे माजी खासदार सुजय विखे यांनी ‘मैं हूँ डॉन’ या गाण्यावर ठेका धरला. विखे यांचा हा ठेका जणू काही थोरातांना खिजवण्याचा प्रयत्नच होता.
विखे अन् थोरात यांच्यातील राजकीय वैर वेगळ्याच पातळीवर पोचलं आहे. विखे हे थोरात यांना डिवचण्याची कोणतीही संधी सोडत नाही. लोकसभा आणि विधानसभा निवडणुकीनंतर हा राजकीय संघर्ष अधिकच वाढला आहे. बाळासाहेब थोरात यांना पराभूत करण्यासाठी सुजय विखे यांनी संगमनेर मतदारसंघात अनेक सभा घेत, अमोल खताळ यांना ताकद दिली होती.
