कोपरगाव । नगर सहयाद्री:-
शहरातील हनुमाननगर गेट जवळ माझ्या भावाचा खून झाला आहे. त्याचा मृतदेह पोत्यात घालून नेताना मी पाहिले आहे, त्याचा शोध घ्या, त्याचा तपास लागत नाही अशी खोटी माहिती डायल ११२ बर देणाऱ्याविरूद्ध कोपरगाव पोलीस ठाण्यात गुन्हा दाखल करण्यात आला आहे.
मंगळवार दि. २६ नोव्हेंबर रोजी सायंकाळी साडेसहाच्या सुमारास कोपरगाव शहर पोलिस स्टेशनच्या डायल ११२ च्या एमडीटी मशिनवर कॉल आला. शहरातील हनुमाननगर गेटजवळ माझ्या भावाचा खून झाला आहे. त्याचा मृतदेह सापडत नाही. तरी तात्काळ पोलीस मदत पाठवा. घटनेचे गांभीर्य ओळखून पोलीस निरीक्षक भगवान मथुरे यांनी सहाय्यक पोलीस निरीक्षक आशिष शेळके, पो. कॉ. धोंगडे, साळुंके यांना हनुमाननगर येथे पाठविले. पोलीस तेथे गेल्यावर फोन करणाऱ्यास मोबाईलवर संपर्क केला. परंतू तो मोबाईल उचलत नव्हता. पोलिसांनी परिसरातील नागरिकांकडे विचारपूस केली. तेव्हा येथे खुनाची घटना घडली नसल्याचे नागरिकांनी सांगितले
पोलिसांनी संबंधिताला वारंवार फोन केले, त्यानंतर संपर्क झाला असता त्याला पोलिसांनी गाठले. तेव्हा फोन करणारा परशराम रावसाहेब दिवे (वय ३१, रा. हनुमाननगर, कोपरगाव) असल्याचे निष्पन्न झाले. परशरामने सांगितले, माझा सावत्रभाऊ संतोष आडांगळे याचा पहाटे तीन वाजता खून झाला आहे. त्याचा मृतदेह माऊ पवार याने गोणीत घालून घेवून जाताना मी पाहिले आहे.
त्यानंतर पोलिसांनी परशराम दिवे याची पत्नी रत्नमाला दिवे हिच्याशी संपर्क केला, तेव्हा तिने संतोष आडांगळे यांचा मोबाईल क्रमांक पोलिसांना दिला. पोलिसांनी त्याच्याशी संपर्क केला तेव्हा, मी जीवंत आणि सुरक्षित असल्याचे आडांगळे याने सांगितले. त्यानंतर पोलिसांना खात्री झाली की, परशराम दिवे याने कुठलीही घटना घडलेली नसताना त्रास देण्याच्या उद्देशाने डायल ११२ वर खोटी माहिती दिली, त्यानंतर कोपरगाव शहर पोलीस ठाण्यात परशराम दिवे विरुद्ध प्रमाणे गुन्हा दाखल करण्यात आला आहे.
