अहमदनगर । नगर सहयाद्री:-
अहमदनगर – कर्जत रस्त्यावर चिंचोली काळदातजवळ शिक्षकावर लाकडी दांडयाने प्राणघातक हल्ला करण्यात आला. या हल्ल्यात शिक्षकाचा मृत्यू झाला. समवेत दुचाकीवर असलेली पत्नी आणि दोन मुले मात्र हल्ल्यातून बचावली. ही घटना सोमवारी (ता.१२) रात्री साडेआठ ते नऊच्या सुमारास घडली.
कर्जत शहरातील कोटा मेंटॉर्स या संस्थेतील शिक्षक अशोक प्रभाकर आजबे (वय ३३, रा. शिराळ, ता. आष्टी, जि. बीड, हल्ली कर्जत) हे पत्नी आणि दोन मुलांसह मिरजगाव-कर्जत रस्त्यावरून कर्जतच्या दिशेने येत होते. चिंचोली काळदात गावाजवळील लवणात आले असता मागून दुचाकीवर येणार्‍या आरोपींनी लाकडी दांडयाने डोयावर पाठीमागून जोरदार प्रहार केला. त्यात अशोक आजबे यांचा मृत्यू झाला. याबाबत त्यांच्या मामाने खबर दिली.
या संदर्भात पोलिस ठाण्यात गुन्हा दाखल करण्याचे काम सुरू होते. दरम्यान आरोपींच्या शोधार्थ पोलिस पथके रवाना झाली. यातील एका संशयिताला चौकशीसाठी ताब्यात घेतले असल्याचे समजते. उपविभागीय पोलिस अधिकारी विवेकानंद वाखारे यानी घटनास्थळी भेट देत माहिती घेतली. पोलिस निरीक्षक प्रकाश पाटील पुढील तपास करत आहेत. आरोपीच्या शोधासाठी पोलिस पथके रवाना झाली आहेत. लवकरात लवकर आरोपींच्या मुसया आवळू, असे पाटील यांनी सांगितले.
