अडथळा नसल्याने बिगुल वाजणार / शिर्डी नगरपरिषदेच्या निकालावर टांगती तलवार
अहिल्यानगर | नगर सह्याद्री
जिल्ह्यातील नगरपरिषद, नगरपालिकेच्या निवडणुकांसाठी २ डिसेंबरला मतदान होणार असून, १२ नगरपालिकांपैकी शिर्डी नगरपरिषदेतील आरक्षण पन्नास टक्क्यांहून अधिक असले तरी तेथील निवडणूक होणारच आहे. मात्र, तेथील पदाधिकार्‍यांचे भविष्य सर्वोच्च न्यायालयाच्या पुढील निर्णयावर अवलंबून असणार असल्याने टांगती तलवार कायम आहे. याउलट जिल्हा परिषद, महानगरपालिकेचे आरक्षण ५० टक्क्यांच्या आत असल्याने या निवडणूका पार पडण्यात आता कसलाच अडथळा राहिली नाही. निवडणूक आयोगाच्या आदेशाने या निवडणूकांचा कार्यक्रम जाहीर होणार आहे.
सर्वोच्च न्यायालयाने शुक्रवारी स्थानिक स्वराज संस्थांच्या निवडणुकीला स्थगिती न देता ठरलेल्या वेळेत पूर्ण करण्याचे निर्देश दिले आहेत. त्यामुळे सध्या सुरू असलेल्या नगरपालिका निवडणुकीची प्रक्रिया कायम राहणार आहे. मात्र, ज्या ठिकाणी आरक्षणाची मर्यादा ओलांडली आहे, त्या ठिकाणचा निकाल न्यायालयाच्या निकालाच्या अधीन राहणार आहे.
आरक्षणाची मर्यादा ५० टक्क्यांपेक्षा जास्त होणार नाही, याची दक्षता घेण्यास सर्वोच्च न्यायालयाने राज्य शासनाला सूचित केले आहे. अहिल्यानगर जिल्ह्यात जिल्हा परिषद, महानगरपालिका व ११ नगरपालिकांत आरक्षण ५० टक्क्यांच्या आत असल्याने या निवडणुकांना अडथळा नाही. शिर्डी नगरपरिषदेतील आरक्षण पन्नास टक्क्यांहून अधिक असले तरी तेथील निवडणूक होणार आहे. मात्र, तेथील लोकनियुक्त मंडळाचे भविष्य सर्वोच्च न्यायालयाच्या पुढील निर्णयावर अवलंबून असणार आहे. त्यामुळे निवडून आलेल्या नगराध्यक्षांसह नगरसेवक पदावर निकालाची टांगती तलवार कायम आहे.
श्रीरामपूर, अकोले पंचायत समितीत वाढीव आरक्षण आहे. त्यामुळे निवडणूक आयोग याबाबत काय निर्णय घेणार याकडे लक्ष लागले आहे. अहिल्यानगर महानगरपालिकेच्या प्रभागातील ६८ जागांची आरक्षण प्रक्रिया पूर्ण करण्यात आलेली आहे. महापालिकेच्या ६८ जागांपैकी ४७ टक्के जागा आरक्षित असून, ५३ टक्के जागा खुल्या आहेत. महापालिकेतील आरक्षण ४७ टक्के असल्याने तेही ५० टक्क्यांच्या आत आहे.
