श्रीगोंदा । नगर सहयाद्री:-
चांडगाव (ता. श्रीगोंदा) येथील ग्रामदैवत श्री भैरवनाथ महाराज यांचा (दि.२२) रोजी यात्रा उत्सव होता. दरम्यान, घरातील साफसफाई करतांना मायलेकाचा विजेच्या धक्क्याने मृत्यू झाला. या दुर्दैवी घटनेमुळे गावावर शोककळा पसरली आहे. राजेंद्र हिरामण लोंढे, सखुबाई हिरामण लोंढे असे मायलेकांचे नाव आहे.
मंगळवार (दि.२२) रोजी सकाळी आठच्या सुमारास राजेंद्र हिरामण लोंढे घरावरील छत पाण्याने धुत होते. दरम्यान, त्याचा हात विजेच्या वायरला लागला असता त्यांना विजेचा धक्का बसला. जवळ असलेल्या त्यांच्या मातोश्री सखुबाई हिरामण लोंढे यांनी समोरचा प्रकार पाहत ओरडत मुलाला वाचवण्याचा प्रयत्न केला. परंतु त्यांना देखील विजेचा धक्का लागल्यामुळे मायलेकाचा मृत्यु झाला. त्यांचा आवाज ऐकून घरातील इतरही माणसे छतावरती धावून गेली.
घडलेली घटना लक्षात आल्यावर त्यांनी विद्युत वायर कट करत वीज पुरवठा खंडित केला. त्यानंतर दोघा मायलेकांना ताबडतोब श्रीगोंदा येथील खाजगी रुग्णालयात दाखल करण्यात आले. मात्र त्यांनी उपचाराधी मयत घोषित करण्यात आले. याबाबत पोलीस ठाण्यात अकस्मत मृत्यूची नोंद करण्यात आली आहे. गावच्या यात्रेच्या दिवशी सदरचा प्रकार घडल्यामुळे शोककळा पसरली असून सर्व कार्यक्रम रद्द करण्यात आले आहेत.
