केंद्र सरकारच्या सीआरआयएफ फंडातून पाच कोटींचा निधी मंजूर : आ. संग्राम जगताप / मार्केटयार्ड ते कोठी रस्त्याचे आधुनिक पद्धतीने काँक्रीटीकरण
अहिल्यानगर | नगर सह्याद्री
शहरातील पुणे रोड वरील उड्डाणपुलाखालील मार्केटयार्ड ते सक्कर चौक पर्यंतच्या रस्त्याचे अत्याधुनिक पद्धतीने काँक्रीटीकरणाचे काम सध्या वेगाने प्रगतीपथावर आहे. आ.संग्राम जगताप यांच्या प्रयत्नातून आता केंद्रा सरकारच्या रस्ते व वाहतूक मंत्रालयाच्या वतीने अहिल्यानगर शहरातील मार्केटयार्ड ते कोठी पर्यंतच्या रस्त्याच्या काँक्रीटीकरण कामासाठीही सीआरआयएफ फंडातून ५ कोटी रुपयांचा निधी उपलब्ध झाला आहे. मार्केटयार्ड ते सक्कर चौक पर्यंतच्या रस्त्याचे काम पूर्ण झाल्यावर या कामास सुरवात होणार आहे.
शहरातील पुणे रोड वरील उड्डाणपुला खाली मोठ्याप्रमाणात वाहनांची वर्दळ असल्याने या रस्त्याचे रुंदीकरण करून अत्याधुनिक पद्धतीने काँक्रीटीकरणाचे काम हाती घेतले आहे, केंद्र सरकार व राज्य सरकार कडे केलेल्या पाठपुराव्यामुळे या कामासाठी भरीव निधी उपलब्ध झाला आहे. टप्प्याटप्प्याने हा रस्ता पूर्णपणे काँक्रीटचा करणार आहे. यासाठी केंद्र व राज्य सरकारचे सहकार्य लाभत आहे, अशी माहिती आ. संग्राम जगताप यांनी दिली.
