Chemical Tanker Explosion : केमिकलने भरलेल्या टँकरचा भीषण स्फोट झाल्याची धक्कादायक घटना समोर आली आहे. या स्फोटानंतर टँकरला लागलेल्या आगीत ४ जणांचा होरपळून मृत्यू झाल्याची माहिती सांगण्यात येत आहे.
आज सकाळी (२० डिसेंबर) रोजे ही घटना घडली आहे. शुक्रवारी सकाळी जयपूर-अजमेर महामार्गावर एक केमिकल वाहून नेणाऱ्या टँकरला एका ट्रकने धडक दिली आणि त्यानंतर टँकरचा स्फोट झाला अशी प्राथमिक माहिती आहे.
या स्फोटानंतर लागलेली आग काही क्षणात त्या ठिकाणी जवळ असलेल्या एका इंधन पंपापर्यंत पसरली. तसेच त्या पंपाच्या परिसरात उभी असलेली काही इतर वाहनेही जळून खाक झाले आहेत.
या घटनेनंतर तात्काळ पोलिसांसह स्थानिक प्रशासन आणि अग्निशमन दल घटनास्थळी दाखल झालं. सध्या बचावकार्य सुरु असून आग विझवण्याचे शर्थीचे प्रयत्न सुरू आहेत.दरम्यान, या घटनेत जखमी झालेल्यांना उपचारासाठी रुग्णालयात दाखल करण्यात आलं आहे.
सदरची घटना जयपूरमधील भानक्रोटा परिसरात अजमेर महामार्गावर घडली. त्यानंतर जयपूर-अजमेर महामार्ग तात्पुरता बंद करण्यात आला आहे. या घटनेनंतर घटनास्थळी मोठा पोलीस बंदोबस्तही तैनात करण्यात आला आहे.
