Manoj Jarange Patil: दरवर्षी शिवसेनेचा, आरएसएसचा आणि भाजप नेत्या पंकजा मुंडे यांचा दसरा मेळावा आयोजित केला जातो. या मेळाव्यात राजकीय नेते आपल्या कार्यकर्त्यांशी संवाद साधतात. यावेळी आणखी एका दसरा मेळाव्याची भर पडण्याची शक्यता वर्तवली जात आहे. मराठा आंदोलक मनोज जरांगे पाटील हे दसरा मेळावा घेणार असल्याचे बोलले जात आहे.
मनोज जरांगे पाटील यांनी मराठा आरक्षणासाठी तीव्र लढा उभारला आहे. सरकारने त्यांच्या मागण्या मान्य न केल्यामुळे त्यांनी आगामी निवडणुकांसाठी तयारी सुरू केली आहे. या पार्श्वभूमीवर मनोज जरांगे पाटील यांचा दसरा मेळावा आयोजित करण्याची माहिती मिळाली आहे.
या मेळाव्याच्या नियोजनासाठी बीडच्या नारायणगड येथे बैठक आयोजित करण्यात आली आहे. या बैठकीत मेळाव्याची रूपरेषा ठरणार असून, बीड जिल्ह्यातील मराठा आंदोलनातील समन्वयक व समाज बांधवांची उपस्थिती राहणार आहे.
मनोज जरांगे पाटलांचा मेळावा नारायणगड येथे होण्याची शक्यता आहे. त्यामुळे बीडमध्ये मनोज जरांगे पाटलांच्या दसरा मेळाव्याची परंपरा सुरू होणार का, याकडे सर्वांचे लक्ष लागले आहे.
