पुणे । नगर सह्याद्री
लोकमान्य बाळ गंगाधर टिळक यांचे पणतू, ज्येष्ठ शिक्षणतज्ज्ञ, पत्रकार आणि सामाजिक कार्यकर्ते डॉ. दीपक टिळक यांचे पुण्यात दुःखद निधन झाले. त्यांनी पुण्यातील राहत्या घरी अखेरचा श्वास घेतला. मृत्युसमयी ते ७८ वर्षांचे होते. त्यांच्या पश्चात मुलगा, मुलगी, नातवंडे असा परिवार आहे. आज (बुधवार) सकाळी ८ ते ११ या वेळेत त्यांचे पार्थिव पुण्यातील टिळकवाडा येथे अंत्यदर्शनासाठी ठेवण्यात येणार असून, दुपारी १२ नंतर वैकुंठ स्मशानभूमीत त्यांच्यावर अंत्यसंस्कार करण्यात येणार आहेत.
‘केसरी’चे विश्वस्त संपादक, टिळक महाराष्ट्र विद्यापीठाचे माजी कुलगुरू आणि लोकमान्य टिळक यांचे पणतू डॉ. दीपक टिळक यांनी शिक्षण, पत्रकारिता, सामाजिक कार्य या क्षेत्रांत उल्लेखनीय योगदान दिले. टिळक कुटुंबाच्या सामाजिक कार्याचा वारसा त्यांनी प्रामाणिकपणे पुढे नेत, ‘केसरी’सारख्या ऐतिहासिक दैनिकाच्या माध्यमातून राष्ट्रभक्ती, मूल्याधिष्ठित विचार आणि लोकशिक्षणाचा ध्यास जपला.
डॉ. दीपक टिळक यांनी ट्रस्टच्या माध्यमातून लोकमान्य टिळकांचा स्वातंत्र्यलढ्यातील आणि सामाजिक सुधारणांचा वारसा जपण्याचे कार्य केले. त्यांनी सामाजिक आणि सांस्कृतिक मूल्यांना चालना देण्यासाठी योगदान दिले, तसेच पुरस्कार सोहळ्याद्वारे राष्ट्रीय नेतृत्वाला प्रोत्साहन दिले. त्यांच्या कार्यामुळे पुण्यातील टिळक स्मारक मंदिर हे सांस्कृतिक आणि ऐतिहासिक केंद्र म्हणून ओळखले जाते. दीपक टिळक यांनी काही काळ टिळक महाराष्ट्र विद्यापीठाचे कुलगुरू म्हणून काम पाहिले आहे.
