कर्जत | नगर सह्याद्री
जिल्ह्यातील कर्जत शहरात कत्तलीसाठी तीन ठिकाणी डांबून ठेवलेल्या गोवंशीय १७ जनावरांची सुटका स्थानिक गुन्हे शाखेच्या पोलिसांनी केली. या संदर्भात तीन गुन्हे दाखल करण्यात आली असून आरोपींकडून दोन लाख १५ हजार रुपये किमतीची १७ जनावरे जप्त करण्यात आली आहेत.
जिल्हा पोलीस अधीक्षक राकेश ओला यांनी अहिल्यानगर स्थानिक गुन्हे शाखेला जिल्ह्यातील अवैध व्यावसायिकांवर कारवाई करण्याचे आदेश दिलेले आहेत. त्यानुसार ही कारवाई करण्यात आली आहे. नमुद आदेशान्वये पोलीस निरीक्षक दिनेश आहेर यांनी मिळालेल्या माहितीवरून स्थानिक गुन्हे शाखा व तपास पथकातील पोलीस अंमलदार अतुल लोटके, गणेश धोत्रे, शाहीद शेख, सोमनाथ झांबरे, रोहित मिसाळ, आकाश काळे, भाऊसाहेब काळे, बाळासाहेब गुंजाळ, मनोज लातूरकर, उमाकांत गावडे व अरुण मोरे अशांचे पथक तयार करण्यात आले. या पथकाला कर्जत पोलीस स्टेशन हद्दीत गोवंशीय जनावरे कत्तल करण्याच्या उद्देशाने डांबून ठेवली असल्याची माहिती मिळाली. तेव्हा शनिवार १७ मे २०२५ रोजी पथकातील पोलीस अंमलदारांनी कर्जत शहरामध्ये मिळालेल्या माहितीवरून ०३ वेगवेगळ्या ठिकाणी छापे टाकले. तेव्हा त्यांना कत्तल करण्याचे उद्देशाने गोवंशीय जनावरे निदर्यतेने डांबून ठेवल्याचे आढळून आले. त्या ठिकाणी पंचासमक्ष छापे टाकून कारवाई केली.
कर्जत पोलीस स्टेशनला या संदर्भात ०३ गुन्हे दाखल करण्यात आले आहेत. छाप्यात दोन लाख १५ हजार रुपये किमतीची १७ गोवंशीय लहान मोठी जनावरे ताब्यात घेण्यात आली आहेत. कर्जत पोलीस स्टेशन व गु. र. नं ३०६/२०२५ अन्वये फरार आरोपी मुन्ना हुसेन कुरेशी (मोहल्ला, कर्जत) याच्या ताब्यातील ६० हजार रुपये किमतीची सहा जनावरे ताब्यात घेण्यात आली. अतीक कुरेशी, निसार कुरेशी (पूर्ण नाव माहीत नाही, रा. कर्जत, दोघेही फरार) यांच्या ताब्यातून ७० हजार रुपये किमतीची सहा गोवंशीय जनावरे तर अशोक बाजीराव लोंढे (रा. थेरवाडी, फरार) व शोएब कुरेशी (रा. कर्जत, फरार) याच्या ताब्यातून ८५ हजार रुपये किमतीची पाच गोवंशीय जनावरे ताब्यात घेण्यात आली आहेत.
ही कारवाई जिल्हा पोलीस अधीक्षक राकेश ओला, अपर पोलीस अधीक्षक प्रशांत खैरे व कर्जत उपविभागाचे उपविभागीय पोलीस अधिकारी विवेकानंद वाखारे यांच्या सूचना व मार्गदर्शनाखाली स्थानिक गुन्हे शाखेचे पोलीस अधिकारी व अंमलदार यांनी केली आहे.
