पुणे / नगर सह्याद्री –
राज्यात दूध भेसळ रोखण्यासाठी लवकरच नवा कायदा अस्तित्वात येईल, अशी माहिती दुग्धविकास मंत्री अतुल सावे यांनी दिली. राज्यात दुधाला समान दर, एक राज्य एक ब्रँड, एक जिल्हा एक दूध संघ, तसेच एक गाव एक दूध संस्था स्थापन करण्याची मागणी प्रतिनिधींनी केली. त्यावर सकारात्मक निर्णय घेण्यात येईल, असे आश्वासन मंत्री सावे यांनी या वेळी दिले.
दुग्धविकास विभागाच्या १५० दिवसांच्या आराखड्याच्या अनुषंगाने नुकतीच बैठक झाली. या वेळी दुग्धविकास विभागाचे सचिव डॉ. रामास्वामी एन., महानंदचे व्यवस्थापकीय संचालक अनिल हातेकर यांच्यासह राज्यातील प्रमुख दूध संघांचे प्रतिनिधी, विभागाचे वरिष्ठ अधिकारी उपस्थित होते.
मंत्री सावे म्हणाले, की दिवसातून दोन वेळा दूध संकलन करण्याची मागणी पूर्ण करण्याबाबत विचार करण्यात येईल. दूध संकलनासाठी शेतकरी प्रोड्यूसर कंपन्यांची मदत घेण्याबाबत निर्णय घेतला जाईल. महानंदद्वारे अधिकाधिक दूध संकलन वाढविण्यासाठी प्रयत्न करण्यात येतील.
