अहियानगर । नगर सहयाद्री:-
नगर तालुक्यातील खडकी शिवारात बेकायदेशीरपणे विदेशी दारूची वाहतूक करणारा कंटेनर पोलिसांनी पकडला. त्यात दहा ८४ लाख ९ हजार सहाशे रुपयांची अवैध दारू, २१ लाखांचा कंटेनर, १० हजार रुपये किंमतीचा एक मोबाइल असा १ कोटी ५ लाख १९ हजार सहाशे रुपये किंमतीचा मुद्देमाल जप्त करण्यात आला. ही घटना गुरुवारी (ता.०३) रोजी सायंकाळी सहा वाजण्याच्या सुमारास घडली.
नगर तालुका पोलीस स्टेशन हद्दीत दौड रस्त्याने नगरकडे दारुने भरलेला एक कंटेनर येत असल्याची माहिती पोलिसांना मिळाली. पोलीस अधिक्षक राकेश ओला राज्य उत्पादन शुल्क अधिक्षक सोनोने, अपर पोलीस अधिक्षक प्रशांत खैरे, उपविभागिय पोलीस अधिकारी संपतराव भोसले यांच्या सूचने नुसार व स्थानिक गुन्हे शाखेचे पोलीस निरीक्षक दिनेश आहेर यांचे मार्गदर्शनाखाली सपोनि श्री. प्रल्हाद गिते, दारुबंदी विभाग निरीक्षक घुगे, कुसळे उपनिरीक्षक रुपेश चव्हाण, उपनिरीक्षक नवनाथ घोडके, रविंद्र जाधव, उपनिरीक्षक रविंद्र झोळ, उत्पानशुल्क जवान गणेश पडवळे स्थानिक गुन्हे शाखेचे पोहेकॉ शाहीद शेख, पोहेकॉ अरुण गांगुर्डे, पोहेकॉ गणेश धोत्रे, पोकॉ सागर मिसाळ यांच्या पथकाने खडकी शिवार येथे सापळा रचला.
कंटेनरला (के. ऐ. २५ ऐ. बी ५१ ६५ ) थांबण्याचा इशारा केला असता चालकाने कंटेनर रस्त्यावर सोडून लगतच्या उसाच्या शेतात धूम ठोकली. कंटेनरचे मागील दरवाजे बंद असल्याने ते पोलिस ठाण्यात आणले. त्याची तपासणी केली असता त्यात दारू बाटल्यांचे बॉक्स मिळून आले. पुढील तपास राज्य उत्पादन शुल्कचे अधिकारी करीत आहेत.
