मुंबई । नगर सहयाद्री
बॉलिवूडमधून एक अत्यंत दुःखद बातमी समोर आली आहे. अभिनेत्री करिश्मा कपूर यांचे माजी पती आणि उद्योजक संजय कपूर यांचे वयाच्या ५३व्या वर्षी हृदयविकाराच्या झटक्याने निधन झाले. यूकेमध्ये पोलो खेळताना मैदानावरच त्यांना हार्ट अटॅक आला आणि काही क्षणांतच त्यांचा मृत्यू झाला. संजय कपूर हे ‘सोना कॉमस्टार’ या ऑटो कंपोनेंट्स उत्पादन करणाऱ्या आघाडीच्या कंपनीचे चेअरमन होते. त्यांच्या अकस्मात निधनाने कॉर्पोरेट क्षेत्रातही शोककळा पसरली आहे.
संजय कपूर हे युनायटेड किंगडममध्ये पोलो स्पर्धेत सहभागी झाले होते. खेळादरम्यान त्यांना हृदयविकाराचा तीव्र झटका आला. तात्काळ वैद्यकीय मदत मिळवण्यात आली, मात्र त्यांना वाचवण्यात अपयश आले. विशेष म्हणजे मृत्यूपूर्वी केवळ काही तास आधी त्यांनी अहमदाबादमध्ये १२ जून रोजी घडलेल्या एअर इंडिया विमान अपघातावर ट्विट करत शोक व्यक्त केला होता. हे ट्विट आता त्यांच्या शेवटच्या भावना म्हणून सोशल मीडियावर वेगाने व्हायरल होत आहे.
संजय कपूर आणि करिश्मा कपूर यांचे लग्न २००३ साली झाले होते. मात्र, हे वैवाहिक जीवन दीर्घकाळ टिकले नाही. २०१६ साली त्यांचा अधिकृत घटस्फोट झाला. त्यानंतर २०१७ मध्ये संजय कपूर यांनी प्रिया सचदेव यांच्याशी विवाह केला. त्यांच्या या विवाहातून अजारियस नावाचा मुलगा असून तो केवळ ७ वर्षांचा आहे.करिश्मा कपूर आणि संजय कपूर यांना दोन मुले – समायरा आणि कियान – असून, संजय कपूर यांच्या निधनामुळे केवळ करिश्मा नव्हे, तर संपूर्ण कपूर आणि सचदेव कुटुंबांवर दु:खाचा डोंगर कोसळला आहे.
