अहिल्यानगर | नगर सह्याद्री:-
महापालिकेच्या आरोग्य विभागातील औषध खरेदी व वापराबाबत नोंद असलेले रजिस्टर व इतर कागदपत्रे असलेले कपाट त्याची चावी उपलब्ध होईपर्यंत मंगळवारी सील करण्यात आले आहे. आरोग्य विभागाच्या कामकाजाची सध्या समितीमार्फत चौकशी सुरू असून, या पार्श्वभूमीवर हे कपाट सील करण्यात आल्याचे सांगण्यात आले.
आयुक्त तथा प्रशासक यशवंत डांगे यांनी आरोग्य विभागाच्या संपूर्ण कामकाजाची समितीमार्फत चौकशी सुरू केली आहे. उपायुक्त विजयकुमार मुंडे, मुख्य लेखापरीक्षक विशाल पवार व प्रभारी वैद्यकीय आरोग्य अधिकारी डॉ. सतीश राजूरकर यांची समिती ही चौकशी करत आहे. यात औषध खरेदीचीही चौकशी होणार असल्याचे समजते.
औषध खरेदी व वापराबाबतच्या नोंदी असलेले रजिस्टर व कागदपत्रे ज्या कपाटात आहेत, त्याची चावी तत्कालीन फार्मासिस्टकडे आहे. त्या सध्या रजेवर असल्याने कपाटाची चावी मिळेपर्यंत ते कपाट प्रभारी वैद्यकीय आरोग्य अधिकाऱ्यांच्या आदेशानुसार सील करण्यात आले आहे.
दरम्यान, समितीमार्फत चौकशी प्रगतीपथावर आहे. संपूर्ण कामकाजाची चौकशी असल्याने त्याला अवधी लागणार आहे. येत्या आठवडाभरात चौकशीचा अहवाल येण्याची शक्यता असल्याचे आयुक्त यशवंत डांगे यांनी सांगितले.
