Butox Injection Death: एका हॉस्पिटलमध्ये उपचारादरम्यान दोन्ही बालकांचा मृत्यू झाल्याची धक्कादायक घटना समोर आली आहे. सेरेब्रल पाल्सीने ग्रस्त असलेल्या या बालकांना दिले गेलेले Butox इंजेक्शन मृत्यूचे कारण असू शकते, अशी प्राथमिक शंका व्यक्त होत आहे. त्यामुळे संबंधित कंपनीला रिपोर्ट सादर करण्यात आला असून, संपूर्ण बॅच महाराष्ट्रातून मागवण्यात आली आहे. सदरचा प्रकार जळगाव शहरातील प्रसिद्ध जावळे हॉस्पिटलमध्ये घडला. या प्रकरणानंतर पालकांनी डॉक्टरांवर हलगर्जीपणाचा आरोप करत कायदेशीर कारवाईची मागणी केली आहे.
पोलिसांकडून दोन्ही प्रकरणांमध्ये अकस्मात मृत्यूची नोंद करण्यात आली आहे. पुढील तपास सुरू असून, पोस्टमार्टम रिपोर्टनंतर मृत्यूचे नेमके कारण स्पष्ट होणार आहे. जळगावमधील अडीच वर्षांचा आणि तीन वर्षांचा असे दोन बालक सेरेब्रल पाल्सीवर उपचार घेण्यासाठी जावळे हॉस्पिटलमध्ये दाखल झाले होते. दोघांनाही एकाच प्रकारचं Butox इंजेक्शन देण्यात आलं. चार तासांच्या आत दोघांच्याही प्रकृतीत गंभीर बिघाड झाला. यानंतर 18 एप्रिल रोजी पहिल्या बालकाचा मृत्यू रुग्णवाहिकेत झाला. 20 एप्रिल रोजी दुसऱ्या बालकाचा मृत्यू दुसऱ्या हॉस्पिटलमध्ये उपचार घेत असताना झाला. जावळे हॉस्पिटलचे संचालक
डॉ. हर्षल जावळे यांनी सांगितले की, “दोन्ही बालकांना Butox इंजेक्शनच देण्यात आलं होतं. संबंधित बॅचमध्ये काही दोष असल्याची शक्यता वर्तवली जात आहे. संपूर्ण बॅच राज्यभरातून मागवली आहे. तसेच, जर आमच्या बाजूने कोणतीही चूक आढळली, तर कायदेशीर कारवाईस सामोरे जाऊ, असंही त्यांनी स्पष्ट केलं. डॉक्टरांनी सांगितलं की Butox इंजेक्शन व्यतिरिक्त इतर औषधांनाही साइड इफेक्ट्स शक्य असल्याने संपूर्ण तपास सुरू आहे. दरम्यान, मृत बालकांच्या पालकांनी संताप व्यक्त करत डॉक्टरांवर गंभीर आरोप केले आहेत. पोलीस अधीक्षकांकडे तक्रार दाखल करण्यात आली असून, पोलीस अधिकाऱ्यांनी “तपासानंतर योग्य ती कारवाई केली जाईल” असं सांगितलं आहे.
