मुंबई। नगर सहयाद्री:-
भारताचे ज्येष्ठ उद्योगपती, टाटा सन्सचे माजी अध्यक्ष रतन टाटा यांचे बुधवारी संध्याकाळी निधन झाले. मुंबईतील ब्रीच कँडी रुग्णालयात त्यांनी अखेरचा श्वास घेतला. वयाच्या ८६ व्या वर्षी त्यांचे निधन झाले. रतन टाटा यांच्या निधनाने देशभरात शोककळा पसरली असून पंतप्रधान मोदींसह अनेक दिग्गजांनी त्यांना श्रद्धांजली वाहिली. २५० वर्षांपूर्वी सुरु झालेल्या टाटा उद्योग समुहाचे माजी अध्यक्ष असलेले रतन टाटा यांनी आपल्या असामान्य कर्तृत्वाने उद्योग जगतात वेगळी छाप पाडली होती.
रतन टाटा यांचे पार्थिव सध्या त्यांच्या हलेकाय या राहत्या निवासस्थानी ठेवण्यात आले आहे. सकाळी १० ते दुपारी ३.३० वाजेपर्यंत सर्वसामान्य लोकांना एनसीपीए याठिकाणी टाटा यांच्या पार्थिवाचे अंत्यदर्शन घेता येईल एनसीपीएच्या प्रवेशद्वार क्रमांक ३ मधून लोकांना अंत्यदर्शनासाठी प्रवेश दिला जाईल, तर प्रवेशद्वार क्रमांक २ मधून नागरिकांना दर्शन घेऊन बाहेर पडता येईल. दुपारी ३.३० वाजता टाटा यांचे पार्थिव अंत्यसंस्कार करण्यासाठी वरळीच्या दिशेने रवाना होईल.
सायंकाळी ४ वाजता मरीन ड्राईव्ह मार्गे पेडर रोड करत ही अंत्ययात्रा वरळी येथील स्मशानभूमीत पोहचेल. सायंकाळी ४.३० वाजता टाटांच्या पार्थिवावर शासकीय इतमामात पारसी पद्धतीने अंत्यसंस्कार केले जातील. दरम्यान, राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार यांच्यासह केंद्रीय गृहमंत्री या अंत्यसंस्कारावेळी उपस्थित राहणार आहेत.
