अहमदनगर | नगर सह्याद्री:-
दोन चारचाकी वाहनांच्या अपघातात एका तरूणाचा मृत्यू झाल्याची घटना नगर – मनमाड महामार्गावरील विळद (ता. नगर) शिवारातील हॉटेल जय मातादीसमोर घडली. रूपेश मच्छिंद्र राऊत (वय २९ रा. केंदळ ता. राहुरी) असे मयत तरूणाचे नाव आहे.
त्यांचा चुलत भाऊ भाऊसाहेब कचरू राऊत (वय ४९ रा. केंदळ) यांनी दिलेल्या फिर्यादीवरून ट्रकवरील अज्ञात चालकाविरूध्द एमआयडीसी पोलीस ठाण्यात गुन्हा दाखल करण्यात आला आहे.
रूपेश हे पुणे येथून केंदळ येथे नगर – मनमाड महामार्गावरून महींद्रा बोलेरो घेऊन येत असताना दुपारी साडेतीनच्या सुमारास विळद शिवारात हॉटेल जय मातादीसमोर बोलेरोला ट्रकने धडक दिली. या धडकेत रूपेश यांचा मृत्यू झाला. ट्रक चालक अपघाताची खबर न देता तसेच मदत न करता तेथून पळून गेला असल्याचे फिर्यादीत म्हटले आहे.
