अहिल्यानगर | नगर सह्याद्री
शहरातील नेप्ती नाका ते आयुर्वेद कॉर्नर रोड परिसरात एका शेडच्या आडोशाला सुरू असलेल्या अवैध गॅस रिफिलिंगच्या मोठ्या अड्ड्याचा स्थानिक गुन्हे शाखेच्या पथकाने पर्दाफाश केला आहे. रविवारी (दि. २६) दुपारी दोनच्या सुमारास ही धडक कारवाई करण्यात आली.
या कारवाईत पोलिसांनी सतीष आनंद टेकाळे (वय ३२, रा. नालेगाव) याला रंगेहाथ पकडले असून, त्याच्याकडून ३२ हजार ४५० रुपयांचा मुद्देमाल जप्त करण्यात आला आहे.पोलिसांनी दिलेल्या माहितीनुसार, नेप्ती नाका परिसरातील बैरागी वॉशिंग सेंटरच्या पाठीमागे मोकळ्या जागेत, शेडच्या आडोशाला एक व्यक्ती घरगुती गॅस टायांमधून वाहनांमध्ये अनधिकृतपणे गॅस भरत असल्याची गुप्त माहिती स्थानिक गुन्हे शाखेला मिळाली होती.
या माहितीच्या आधारे पथकाने सापळा रचून छापा टाकला. यावेळी आरोपी सतीष टेकाळे हा कोणताही परवाना नसताना, इलेट्रिक मोटार आणि वजनकाट्याच्या सहाय्याने गॅस रिफिलिंग करत असल्याचे आढळून आले. लोकांच्या जीवितास धोका निर्माण होईल हे माहीत असतानाही तो हा जीवघेणा प्रकार करत होता.पोलिसांनी घटनास्थळावरून १० हजार रुपये किमतीची इलेट्रिक मोटार व कॉम्प्रेसर, ४ हजारांचा इलेट्रॉनिक वजन काटा, तसेच एचपी, भारत गॅस व इंडियन गॅस कंपन्यांच्या एकूण ११ घरगुती गॅस टाया (काही भरलेल्या व काही रिकाम्या) असा एकूण ३२ हजार ४५० रुपयांचा मुद्देमाल जप्त केला आहे.
याप्रकरणी, स्थानिक गुन्हे शाखेचे पोलीस हेड कॉन्स्टेबल सुनिल विनायक पवार यांच्या फिर्यादीवरून कोतवाली पोलीस ठाण्यात आरोपी सतीष टेकाळे विरोधात गुन्हा दाखल करण्यात आला आहे. पुढील तपास पोलीस उपनिरीक्षक कृष्णकुमार सेदवाड करत आहेत.
